SON DƏQİQƏ

Naxçıvan Muxtar Respublikası Maliyyə Nazirliyi yanında Maliyyə Tədris Mərkəzində mənzil-kommunal təsərrüfatı profilli müəssisələrin mühasibatlıq işçiləri üçün təşkil olunan təkmilləşdirici kursa yekun vurulub.

Emtv.az yerli mənbələrə istinadən xəbər verir ki, Naxçıvan Muxtar Respublikasının Maliyyə Nazirliyindən bildirilib ki, növbəti təkmilləşdirici kursda mənzil-kommunal təsərrüfatı profilli müəssisələrdən 21 nəfər mühasibatlıq işçisi iştirak edib.

Kursda mənzil-kommunal təsərrüfatı müəssisələrinin gəlir və xərclərinin proqnozlaşdırılması və maliyyələşmə istiqamətləri, mühasibatlıq və maliyyə hesabatlarının hazırlanması, vergi uçotunun təşkili, maliyyə və mühasibatlıq işinin aparılması ilə bağlı hüquqi məsuliyyət, büdcə təşkilatlarında xəzinə əməliyyatlarının təşkili və uçot mövzuları üzrə təlimlər keçirilib.

Mərkəzin sayca 11-ci kursunun gündəliyinə uyğun olaraq, ilk gün Maliyyə Nazirliyinin iqtisadi sahələrin maliyyəsi şöbəsinin müdiri Ağəli Novruzovun “Mənzil-kommunal təsərrüfatı müəssisələrinin gəlir və xərclərinin proqnozlaşdırılması” mövzusunda çıxışı olub.

Növbəti günlərdə Naxçıvan Şəhər İcra Hakimiyyətinin, Naxçıvan Muxtar Respublikası Vergilər və Maliyyə nazirliklərinin, Naxçıvan Muxtar Respublika Prokurorluğunun əməkdaşları müvafiq mövzular üzrə məruzələr ediblər.

Qeyd edək ki, 4 gün keçirilən kursda praktik məsələ və testlərin həllinə yer ayrılıb. Bundan əlavə, təlimdə sual-cavab, testlərin qarşılıqlı işlənməsi və sorğu-anketlərin doldurulması təmin edilib. Həmçinin təlim materialları – slaydlar, müvafiq vəsaitlər təqdim olunub.

Peşəkarlıq səviyyəsinin qiymətləndirilməsi mərhələsindən sonra dinləyicilərə Maliyyə Tədris Mərkəzinin sertifikatları verilib.


Xumar Rəsulova
Emtv.az
Paylaş.