SON DƏQİQƏ

“Erməni hərbçilərinin Rusiya bayrağı altında Suriyaya göndərilməsi Qərb və ərəb dünyası ilə Ermənistan arasındakı münasibətlərə ciddi ziyan vura bilər”.

Emtv.az xəbər verir ki, bunu erməni ekspert Ruben Meqrabyan “1in.am” saytına açıqlamasında deyib.

Onun sözlərinə görə, bu hadisələrin inkişafında ən xoşagəlməyən proses ola bilər.

“Rus hərbçiləri, ümumiyyətlə, Rusiya Suriyada “qəssab” Əsədi dəstəkləmək üçün işləyir və bununla da gündəlik olaraq Suriyada hərbi cinayətlərdə onunla əlbir olurlar. Ermənistanın silahlı qüvvələrinin ruslarla bir cərgədə durmaqla, onlarla əlbir olacaq və bu, Ermənistanı nüfuzdan salmaq olacaq. Onlar bunu başa düşürmü, ya yox? İkincisi, bu hərəkət Ermənistanla Qərb arasındakı münasibətləri pozacaq. Əgər Ermənistan Suriyada iştirak hüququ varsa, bu, mütləq beynəlxalq mandatla olmalıdır, daha Rusiyanın özfəaliyyəti çərçivəsində yox”- ekspert bildirib.

Erməni ekspert onu da bildirib ki, hadisələrin bu cür inkişafı nəticədə Ermənistanı beynəlxalq sanksiyalar təhlükəsi altına sala bilər: “Mən hələ onu demirəm ki, bu Avropada, Yaxın Şərqdə və xüsusən də ərəb dünyasında hansı problemlərə gətirib çıxarar. Bu ərəb ölkələrində kifayət qədər erməni yaşayır. Bu onlara problem yaradar”.

Seymur Rəhimov
Emtv.az