SON DƏQİQƏ

Bu gün ictimaiyyətin, o cümlədən medianın diqqəti, əsasən, Gəncədə baş verən hadisələrə, terror aktlarına yönəlib. Buna görə də digər sahələrdə baş verən bəzi maraqlı proseslər diqqətdən kənarda qalıb. Müdafiə Sənayesi Nazirliyində gedən prosesləri də bunlardan biri hesab etmək olar.

Belə ki, müdafiə sənayesi naziri Yavər Camalovun vəfatından sonra bu postu tutmaq uğrunda ciddi mübarizə başlayıb. Ölkənin müdafiəsi üçün əhəmiyyət kəsb edən bir sahənin uzun müddət rəhbərsiz qalmayacağından, son dövrlər bu mübarizənin əsl savaşa çevrildiyi iddia edilir.

Nazir postuna potensial namizədlər kimi isə mərhum Yavər Camalovun müavinləri olmuş Yəhya Musayevin və Tofiq Rəfiyevin, eləcə də aparat rəhbəri Üzeyir İsmayılovun adları çəkilir.

Bunların içərisində ixtisasca mühəndis-konstruktor olan, hələ 1972-1976-cı illərdə SSRİ Hərbi Sənaye Kompleksinin (HSK) “Azon” zavodunda böyük mühəndis, konstruktor, aparıcı mühəndis, 1981-1992-ci illərdə SSRİ HSK-nın Elektron Hesablayıcı Maşınlar, Bakı Radio və “Alunit” zavodlarında istehsalat şöbəsinin rəisi, xüsusi konstruktor bürosunun rəis müavini, baş mühəndis, 1992-ci ildən isə Azərbaycan Respublikası Müdafiə Nazirliyinin Müdafiə sənayesi idarəsində şöbə rəisi işləyən, 2006-cı ildən Müdafiə Sənayesi Nazirliyinə gətirilən Tofiq Rəfiyevin müdafiə sənayesi naziri postunu tutmağa daha uyğun namizəd olduğu bildirilir.

Ancaq həm yaşlı olması, həm nazirliyin daxilində, hakimiyyət içərisində ciddi dəstəyinin olmaması onun şanslarını azaldır.

Namizədlərdən biri kimi adı çəkilən aparat rəhbəri Üzeyir İsmayılovun ən ciddi dəstəyi isə məhz nazirliyin daxilindədir. Üzeyir İsmayılov mərhum nazirin qardaşı Əlikiram Camalovun kürəkənidir. Müdafiə Sənayesi Nazirliyində Ü.İsmayılovdan başqa işləyən mərhum nazirin yaxın qohumları çoxdur. Mətbuatda yayılan məlumatlara görə, Y.Camalovun qaynı Tacəddin Mirzəyev, qardaşı Əlihüseyn Camalov, dayısı Pirverdi Məmmədov və başqaları nazirlikdə işləyirlər. Ona görə də postlarını sığortalamaq üçün qohumların Ü.İsmayılov üzərində dayandığı bildirilir. Camalovların bağlı olduğu hakimiyyət daxilindəki dairələrin də Ü.İsmayılovun namizədliyini dəstəklədiyi bildirilir.

Ancaq rəhmətə gedən bir nazirin yerinə yaxın qohumunun gətirilməsinin ictimaiyyət tərəfindən yaxşı qarşılanmayacağı perspektivi onun şanslarını aşağı salır.

Üçüncü və əsas namizəd kimi isə Yavər Camalovun vəfatından sonra nazir postunun həvalə olunduğu Yəhya Musayev hesab olunur. Hazırda müvəqqəti nazir səlahiyyətlərini icra edən Yəhya Musayevin hakimiyyət daxilində də ciddi dəstəklərinin olduğu məlumdur. Eyni zamanda nazir səlahiyyətlərini icra etməsinin ona həm də rəqiblərini zərərsizləşdirmək imkanı qazandırdığı bildirilir. Yəhya Musayevin bu imkanlardan maksimum yararlanaraq, rəqiblərini sıradan çıxaracağı və nazir postunu tutmağa nail olacağı ehtimal edilir.

Düzdür, mərhum nazirin nazirlikdə vəzifə tutan qohumlarının Yəhya Musayevin namizədliyinə qarşı olduğu bildirilir. Ancaq bunun Yəhya Musayev üçün ciddi problem yaradacağına az ehtimal verilir. Bu zaman mərhum nazirin də son vaxtlar Y.Musayevlə münasibətlərinin o qədər yaxşı olmadığı, ancaq onu işdən çıxara bilmədiyinə diqqət çəkilir. Hətta mediada yayılan bəzi məlumatlarda Yavər Camalovun vəfat etdiyi gün – 24 iyunda mərhumla müavini arasında mübahisə yaşandığı iddia olunur.

Ancaq bu iddiaların nə qədər doğru olduğunu söyləmək çətindir. Ən azı ona görə ki, Yəhya Musayev mərhum nazir Yavər Camalovun kadrı kimi vəzifədə yüksəlib. 1959-cu ildə Bakı şəhərində anadan olan Yəhya Musa oğlu Musayev ixtisasca mühasibdir. Yavər Camalov harda işləyib, Yəhya Musayev də orda olub. Yavər Camalov 1995–2003-cü illərdə Quruda Neftqazçıxarma İstehsalat Birliyinin baş direktoru olanda Yəhya Musayev onun baş mühasibi olub. 2003–2006-cı illərdə “Azneft” İstehsalat Birliyində baş direktor işləyən Yavər Camalov əvvəlcə Yəhya Musayevi İqtisadiyyat-maliyyə və mühasibat uçotu idarəsinin rəisi. sonra isə özünə müşavir götürüb. Yavər Camalov müdafiə sənayesi naziri postuna təyin olunduqda isə Yəhya Musayevi özünə müavin gətirib.

Müdafiə Sənayesi Nazirliyində də Yəhya Musayev mərhum nazirin «sağ əli» sayılıb. Təsadüfi deyil ki, Müdafiə Sənayesi Nazirliyində (MSN) tikinti-təmir işlərindən tutmuş, nazirliyə, tabeliyindəki zavodlara müxtəlif avadanlıqların alınmasına qədər, bütün pullu işlərə Yəhya Musayev nəzarət edib. Bu üzdən də Yəhya Musayevin mətbuatda ən çox adı hallanan nazir müavinlərindən biri olduğunu söyləyə bilərik. Bu məlumatların əksəriyyətində Yəhya Musayevin adı “qara işlərdə” hallanır.

Belə ki, nazirliyin işçiləri tərəfindən mətbuata ötürülən məlumatlarda MSN-ə ayrılan vəsaitlərə alınan avadanlıqların qiymətlərinin süni şəkildə şişirdilməsində, nazirliyin tabeliyində olan zavodların istehsal etdiyi məhsulların satışından əldə olunan vəsaitlərin qaranlıq məqsədlərə sərf edilməsində də Y.Musayevin adı hallanıb: “Həmin vəsaitlər demək olar ki, bütövlükdə zavod direktorları tərəfindən nəğdləşdirilir və nazirin müavini Yəhya Musayevə qaytarılır. Eyni zamanda, nazirliyin tabeliyində olan müəssisələr iri məbləğdə kreditlər götürməyə vadar edilir və kreditlərin taleyi qaranlıq qalır… Nazirliyin göstərişi ilə MSN-in tabeliyində olan bütün zavodlar böyük məbləğlərdə kredit götürüblər. Həmin kreditlərin 70-80 faizi nəğdləşdirilərək nazirliyin rəhbərliyinə rüşvət olaraq verilib. Zavodlar alınmış kreditlərin rüşvət hissəsini silmək məqsədilə guya təmir işlərinin aparıldığı haqda saxta sənədlər hazırlayıblar. Halbuki, həmin vəsaitlər təmir-tikinti adı ilə mənimsənilib.”

MSN-lə bağlı mətbuata şikayətlərdə, Y.Musayevin adı həmçinin müdafiə sənayesinin inkişafına ayrılan büdcə vəsaitlərinin təyinatından kənarlaçşdırılmasında, yeni alınan avadanlıqların qiymətlərinin şişirdilməsində də hallandırılıb: “Zavodların hesab açdıqları banklar yoxlanılarsa, həmin nəğdləşmə əməliyyatları görünər. Zavodlar həmin vəsaitləri kobud maliyyə səhvlərinə yol verərək silirlər”.

Bunun sübutu kimi hələ də davam edən “MTN işində” Y.Musayevin adının hallanmasına diqqət çəkilir. Söhbət MTN-çilərin əməliyyatının sonunda 2 milyon aldığı iş adamı Kamal Seyfullayevlə bağlı epizoddan gedir. Həmin işin istintaqı zamanı məlum olmuşdu ki, Kamal Seyfullayev tikinti-təmir işləri ilə məşğul olub. “Bakı Tikinti” və “Alfa” MMC-nin rəsmi müdiri və faktiki sahibi olmasa da, həmin şirkətlərin fəaliyyətlərinə rəhbərlik edib. Müdafiə Sənayesi Nazirliyindən böyük sifarişlər alıb, hesabına tez-tez 10 milyonlarla pul girib-çıxıb. Məhz hesabındakı növbəti milyonlar, daha dəqiqi 18 milyonu nağdlaşdırarkən MTN-in əlinə düşüb, 2 milyon verməklə canını qurtarıb. Ancaq məlum olub ki, onun kimi iş adamları vasitəsilə MSN-də təmir-tikinti işlərinə ayrılan pulların böyük hissəsi nağdlaşdırılaraq götürülür. Məlumatlarda nazirlikdə bu işlərin Yəhya Musayevdən məlumatsız həyata kemirilməsinin qeyri-mümkün olduğu bildirilib.

Bundan əlavə Yəhya Musayevin böyük biznes şəbəkələrinin mövcudluğuna iddialar mövcuddur. Belə ki, Azərbaycanda öz fəaliyyətinə 2011-ci ildə başlamış “RETEMS GROUP” şirkətlər qrupunun da Yəhya Musayevə məxsus olduğu bildirilir. Qeyd edək ki, “RETEMS GROUP” tərkibində bir neçə altbölümü birləşdirərək, qida məhsullarının idxalı və ixracı, tikinti, kənd təsərrüfatı məhsullarının istehsalı və ixracı, tekstil, logistika və nəqliyyat xidmətləri sahəsində çalışır.
Biznesin müxtəlif istiqamətlərində fəaliyyət göstərən “RETEMS GROUP”-un şirkətləri yalnız Azərbaycanda deyil, dünyanın bir çox ölkəsində fəaliyyət göstərir. Bu məqsədlə şirkətin xaricdə də çoxlu əməkdaşları işləyir. “RETEMS GROUP”-un rəsmi saytındakı məlumatlara əsasən onun illik dövriyyəsinin 100 milyonlarla dollarla ölçüldüyünü söyləmək olar.

Bundan əlavə mətbuatda Yəhya Musayevin Türkiyədə də 100 milyonlarla dəyəri olan böyük biznes qurduğuna dair məlumatlar yayılıb. Bu biznesin idarəçiliyini isə nazir müavininin İlqar adlı qaynının həyata keçirdiyi bildirilir…

Yəhya Musayevin adı həmçinin oğlu Elvin Musayevin dəyəri 100 min dolları aşan avtomobillərlə də gündəmə gəlib. Elvin Musayevə məxsus bütün avtomobillərin dövlət nömrə nişanlarının “123”-lə bitdiyi iddia edilir(Fotoları aşağıda verilib-red.).

Bir sözlə Yəhya Musayevin keçmiş fəaliyyətinə dair məlumatlar onun nazir təyin olunması önündə əsas maneə hesab olunur. Buna görə də onun nazir postunu tutması üçün rəqiblərini sıradan çıxarması əsas şərt hesab olunur. Bacaracaqmı? (azpolitika.info)

Emtv.az