SON DƏQİQƏ

Müdafiə Sənayesi Nazirliyi ləğv oluna bilər

Bu barədə Emtv.az politika.az-a istinadən xəbər verir ki, struktur islahatları paketində bu məsələ də nəzərdə tutulur.

Yavar Camalovun rəhbərlik etdiyi nazirliyin Müdafiə Nazirliyinə birləşdirilməsi təklif olunur və bu islahatın reallaşması kifayət qədər real görünür.

Hökumətin iqtisadi böhranla əlaqədar qənaətə keçməsi bir-birini təkrarlayan və ya ayrılıqda fəaliyyəti izafi xərc yaradan qurumların ləğvini aktuallaşdırıb.

Hakimiyyətin üst mərtəbəsində gedən müzakirələrdə bu nazirliyin ləğv olunaraq Müdafiə Nazirliyinin tabeliyinə verilməsi, ixtisarların aparılması gündəmə gəlib. Bir müddət əvvəl Milli Məclisin deputatı Zahid Oruc da belə bir təklif səsləndirib.

Bitərəf deputat Müdafiə Sənayesi Nazirliyinin mövcud iqtisadi şəraitdə ləğv olunaraq, başqa nazirliyə birləşdirilməsini mümkün sayıb:

“Hazırki dövrdə dövlət idarəetmə sistemində aparılan islahatlar çərçivəsində Müdafiə Sənayesi Nazirliyinin başqa nazirliyə, məsələn, İqtisadi İnkişaf yaxud Müdafiə nazirliklərindən birinə birləşdirilməsini normal qarşılayaram.

Mahiyyət etibarilə Müdafiə Sənayesi Nazirliyi bir sənaye qrupudur və çoxsaylı zavodlardan ibarətdir. Onun nazirlik statusu daşımasını qoy hökumət üzvləri gözdən keçirsinlər”.

Müdafiə Sənayesi Nazirliyi ölkə başçısının 16 dekabr 2005-ci il sərəncamı ilə yaradılıb. Elə həmin vaxtdan Nazirliyə Yavər Camalov rəhbərlik edir.

Yerli mətbuatın xəbərə görə, Y.Camalov bu qərarı böyük bir hiddətlə qarşılayacaq. Onun nazir kimi səlahiyyətinə son verilməsi iqtidarda tutduğu mövqeni və dayaqları itirməsi deməkdir. Nazir indiki şəraitdə bu postu əldən buraxmaq istəməz.

Son illərdə Azərbaycanda hərbi sənayenin qurulmasına və inkişafına külli miqdarda dövlət vəsaiti xərclənib. Amma hökumətdə bu vəsaitlərin müqabilində görülən işlərdən razı qalmayanlar kifayət qədərdir.

Müdafiə Sənayesi Nazirliyinin ləğv edilməli və səlahiyyətlərinin əsasən İqtisadiyyat Nazirliyinə verilməli olduğunu müstəqil iqtisadçı ekspertlər də təklif edirlər. Amma Müdafiə Nazirliyinə birləşdirilməsi də real variantdır.

Müşahidələr göstərir ki, Camalov məhz bu posta yüksəldikdən sonra onun şəxsi biznesi daha da böyüyüb. Hazırda onun biznes imperiyasın çoxsaylı şadlıq sarayları, restoranlar, ticarət obyektləri daxildir.

Bunun hansı maliyyə qaynaqları hesabına baş verdiyi isə müzakirə və mübahisə obyektidir.

Prezident ictimai-siyasi məsələlər üzrə köməkçisi Əli Həsənov da bu günlərdə bəyan edib ki, hökumət qənaət rejiminə keçib və neft dövrü geridə qalıb. Eyni zamanda prezident İlham Əliyev də bildirmişdi ki, qeyri-neft sektorunun inkişafı gücləndirilməlidir və neft dövrü artıq keçib.

Bu günlərdə isə YAP-şı deputat Siyavuş Novruzov struktur islahatlarının vacibliyini vurğulamışdı və bəzi qurumların ləğv ediləcəyinin anonsunu vermişdi.
Emtv.az