SON DƏQİQƏ

Azərbaycanda terminoloji informasiya sisteminin yaradılması üçün metod və alqoritmlər işləniləcək.

Bu barədə Azərbaycan Milli Elmlər Akademiyasının (AMEA) İnformasiya Texnologiyaları İnstitutunun elmi şurasının növbəti iclasında məlumat verilib.

İnstitutdan bildirilib ki, iclasda şöbə müdiri Gülnarə Nəbibəyova cari ildə nəzərdə tutulan elmi-tədqiqat işləri barədə danışıb. O, “Elektron dövlət mühitində ölkələrarası inteqrasiyanın ölçülməsi üçün metodların işlənilməsi” mövzusunda dissertasiya işinin müdafiəsinin, e-demoqrafiya mühitində araşdırmaların aparılmasının və e-dövlət mühitində Azərbaycan dilinin tətbiqi və inkişafına dair bəzi xidmətlərin yaradılması konsepsiyasının işlənilməsinin nəzərdə tutulduğunu diqqətə çatdırıb.

G.Nəbibəyova, həmçinin şöbə əməkdaşlarının elmi-pedaqoji və elmi-təşkilati fəaliyyəti, müxtəlif təyinatlı nəşrlərin hazırlanması, beynəlxalq elmi əməkdaşlıq əlaqələrinin qurulması və inkişafı ilə bağlı görüləcək işlər haqqında məlumat verib.

Sonra fəaliyyət planına dair müzakirələr aparılıb.

Emtv.az