SON DƏQİQƏ

Naxçıvan Muxtar Respublikasında kütləvi informasiya vasitələrinin maddi-texniki bazasının gücləndirilməsi nəticəsində muxtar respublikanın informasiya blokadası aradan qaldırılıb, azad mətbuatın inkişafı təmin olunub.

Emtv.az xəbər verir ki, bu sözləri universitetin elmi kitabxanasında radio və televiziya işçilərinin peşə bayramı gününə həsr olunmuş “dəyirmi masa”da rektor, AMEA-nın müxbir üzvü Saleh Məhərrəmov səsləndirib.

Saleh Məhərrəmov universitetdə fəaliyyət göstərən televiziya və radio işçilərini peşə bayramı münasibətilə təbrik edib. Bildirib ki, Naxçıvan Muxtar Respublikası Ali Məclisi Sədrinin qayğısı sayəsində həyata keçirilən “Naxçıvan Dövlət Universitetində elektron təhsil şəbəkəsi və rəqəmsal multimedia infrastrukturu” layihəsi çərçivəsində “Universitet” televiziyası müasir texnologiyalarla təchiz olunub, virtual studiya quraşdırılıb.

Universitetin mətbuat şöbəsinin müdiri, jurnalistika və dünya ədəbiyyatı kafedrasının müəllimi Səadət Əliyeva ali təhsil ocağında 2000-ci ildə mətbuat xidmətinin yaradılmasından, 2009-cu ildə mətbuat xidməti əsasında mətbuat şöbəsinin təşkilindən danışıb. Qeyd olunub ki, universitet həyatında baş verən mühüm tədbirlər media mərkəzində işıqlandırılır və kütləvi informasiya vasitələrinə operativ şəkildə çatdırılır.

Jurnalistika və dünya ədəbiyyatı kafedrasının müdiri Şəhla Şirəliyeva 2001-ci ildən universitetdə jurnalistika ixtisası üzrə kadr hazırlığına başlanıldığını bildirib. Qeyd edib ki, 2011-ci ilin aprel ayından nəşrə başlayan “Yeni fikir” qəzeti, “Nuhçıxan” universitet radiosu, bu gün uğurla fəaliyyət göstərən universitet televiziyası (UTV) jurnalistika ixtisasında təhsil alan tələbələrin nəzəri biliklərinin təcrübi olaraq zənginləşdirilməsində mühüm rol oynayır.

Tədbir diskussiya şəklində davam edib.

Emtv.az