SON DƏQİQƏ

Naxçıvan Muxtar Respublikası Ali Məclisi Sədrinin tapşırığına əsasən Şərur və Ordubad rayonlarında Məhdud Fiziki İmkanlılar üçün Naxçıvan Regional İnformasiya Mərkəzində Defektoloji bölmənin yeni filialları yaradılıb.

Emtv.az xəbər verir ki, Bilik günü ərəfəsində yaradılan yeni filialların təqdimatı ilə əlaqədar keçirilən tədbirlərdə əmək və əhalinin sosial müdafiəsi naziri Cavid Səfərov muxtar respublikada sağlamlıq imkanları məhdud uşaqlara göstərilən dövlət qayğısından danışıb. Filialların yaradılmasının dövlət qayğısının əyani ifadəsi olduğunu qeyd edən nazir deyib ki, məşğələlərə cəlb olunan uşaqlar haqqında filialda, eləcə də regional informasiya mərkəzində məlumat bazası yaradılıb.

Naxçıvan Muxtar Respublikasının təhsil naziri Məmməd Qəribov çıxış edərək “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrası, sağlamlıq imkanları məhdud uşaqların təhsili və reabilitasiyası ilə bağlı görülmüş işlər barədə ətraflı məlumat verib.

Valideynlər yaradılan şəraitə görə Naxçıvan Muxtar Respublikası Ali Məclisinin Sədrinə minnətdarlıqlarını bildiriblər.

Filiallar elektron lövhə və digər lazımi tədris vəsaitləri ilə təmin edilib. Burada müvafiq kateqoriyadan olan sağlamlıq imkanları məhdud uşaqların reabilitasiyası üçün məşğələlər keçiriləcək.

Qeyd edək ki, 2010-cu ildən fəaliyyətə başlayan Məhdud Fiziki İmkanlılar üçün Naxçıvan Regional İnformasiya Mərkəzi sağlamlıq imkanları məhdud şəxslərin tədrisi və reabilitasiyası məqsədilə müxtəlif sosial xidmətlər göstərir. 2013-cü ildə Məhdud Fiziki İmkanlılar üçün Naxçıvan Regional İnformasiya Mərkəzində Defektoloji bölmə yaradılıb. Defektoloji bölmənin təşkilində əsas məqsəd muxtar respublikada yaşayan, zehni və nitq inkişafının ləngiməsi olan uşaqların reabilitasiyası üçün lazımi şəraitin yaradılmasıdır. Bölmənin təlim otağı elektron lövhə və digər tədris ləvazimatları ilə təmin edilib.

Emtv.az