SON DƏQİQƏ

Milli Məclisin pullu, var-dövlətli, biznesə başı qarışan deputatları üçün yeni qanun layihəsi gəlir

Emtv.az yerli mətbuata istinadən xəbər verir ki, bəzi biznesmen millət vəkilləri indidən təşvişə düşüblər.

Söhbət ondan gedir ki, qalmaqallı “Deputatların etik davranış qaydaları haqqında” qanun layihəsi iyunun 30-da keçiriləcək növbədənkənar sessiyada müzakirəyə çıxarılacaq.

Amma belə görünür ki, birinci oxunuşdan keçən layihənin gələn həftə keçiriləcək müzakirəsi yenə də gərgin olacaq. Qanun layihəsi lakonik şəkildə hazırlanıb və 13 maddədən ibarətdir.

Qanun layihəsində göstərilir ki, deputat öz fəaliyyətində insanların hüquqlarını, azadlıqlarını, qanuni maraqlarını pozan, onların şərəf və ləyaqətini, işgüzar nüfuzunu alçaldan kobud, təhqiramiz sözlərə yol verməməlidir.

Deputat öz vəzifələrini səmərəli yerinə yetirməyə borcludur və vəzifələrinin icrası ilə bir araya sığmayan sahibkarlıq, kommersiya və başqa ödənişli fəaliyyətlə (elmi, pedaqoji və yaradıcılıq fəaliyyəti istisna olmaqla) məşğul olmamalıdır.

Emtv.az xəbər verir ki, qanun layihəsində bəzi deputatları narahat edəcək “kommersiya fəaliyyəti” ilə bağlı məsələdir.

Ölkə qanunvericiliyi dövlət məmurlarına və millət vəkillərinə sahibkarlıq fəaliyyəti ilə məşğul olmağı, şirkətlər yaratmağı və idarə etməyi qəti qadağan edir. Lakin buna baxmayaraq, bəzi məmur və deputatlar iri biznes müəssisələrinə rəhbərlik edir, qanunun bu tələbini qulaqardına vururlar.

Media üzərindən apardığımız araşdırma zamanı məlum oldu ki, onların sayı heç də az deyil. Lənkəranın deputatları Hadı Rəcəbli və Rüfət Quliyev, Sumqayıtdan Hacı Salayev, Zəngilandan İmamverdi İsmayılov, Binəqədidən Hacı Madər Musayev və Kamaləddin Qafurov bizneslə məşğul olurlar.

Habelə, Şəki seçicilərini təmsil edən Cavanşir Feyziyev, Masallıdan mandat almış Nəriman Əliyev, Gəncənin deputatı Xanlar Fətiyev, Cəlilabadın deputatı Malik Həsənov, Lerikin deputatı İqbal Məmmədov, Goranboy-Naftalan seçki dairəsinin deputatı Mahir Aslanov biznesmendirlər.

Həmçinin, İmişlidən Əsabil Qasımov, Şirvandan Rafael Cəbrayılov, Salyandan Əlağa Hüseynov, Xətaidən Hüseynbala Mirələmov da biznes fəaliyyəti ilə seçilirlər.
Eynilə Tahir Süleymanov, Ağalar Vəliyev, Muxtar Babayev, Ülvi Quliyev, Mirzəcan Xəlilov, Rüstəm Xəlilov, Elçin Quliyev, Azər Kərimli, Cavanşir Paşazadə, Astan Şahverdiyev bu qanun layihəsinin qəbulu üçün tələsmirlər.


Emtv.az xəbər verir ki, onlar bu qanun layihəsinin qeyri-işlək vəziyyətdə olması üçün dəridən-qabıqdan çıxacaqlar. Milli Məclisin İntizam komissiyasının sədri Ağacan Abiyev isə modern.az-a müsahibəsində sərt danışıb.

“Azərbaycan Respublikası Milli Məclisi deputatının etik davranış qaydaları haqqında" yeni qanun layihəsi çox mənasız qanundur. Bizim bundan vacib işlərimiz var. Camaat bizdən yaxşı xəbərlər gözləyir, bu isə qeyri-ciddi qanun layihəsidir".

Emtv.az