SON DƏQİQƏ

Prezident İlham Əliyevin ölkə vətəndaşlarının pulsuz tibbi müayinədən keçirilməsi ilə bağlı verdiyi tapşırığın respublika ərazisində uğurla reallaşdırılması vətəndaşların sağlamlığına göstərilən qayğının təzahürüdür.

Emtv.az Azərtac-a istinadən xəbər verir ki, fevralın 15-dən başlayan vətəndaşların kütləvi pulsuz tibbi müayinə aksiyası Masallı rayonunda da uğurla davam edir.

Əhalinin tibbi müayinələri Masallı Rayon Mərkəzi Xəstəxanasında, Boradigah və Kalinovka sahə xəstəxanalarında, 30 həkim və 28 tibb məntəqəsində təşkil olunub. Bundan əlavə, səyyar tibbi briqadalar müayinəyə gəlmək imkanı olmayanlara xidmət göstərir. Tibbi müayinələr zamanı xəstəliyi müəyyən olunan sakinlər stasionar və ambulator müalicəyə cəlb edilir, ehtiyac yarandıqda isə Bakının ayrı-ayrı sağlamlıq ocaqlarına göndərilirlər.

Cərrah Xəqani Şahmarov bildirib ki, insanların sağlamlığı son dərəcədə vacibdir. Müraciət edənləri dəqiq yoxlamalıyıq ki, sonralar onların səhhətlərində problem yaranmasın. İnsanların sağlamlığı onun cəmiyyətdə mövqeyi, fəaliyyəti, işgörmə qabiliyyəti, ovqatı üçün böyük şərtdir. Bu qayğını isə vətəndaşlara Prezidentimiz, dövlətimiz göstərir.

Rayon sakinləri humanitar aksiyadan razı olduqlarını bildiriblər.

Seybətin kənd tam orta məktəbin direktor müavini Əlikömək Əliyev deyib: “Bu humanist aksiya alqışa layiqdir. Hər bir Azərbaycan vətəndaşı öz sağlamlığı üçün müraciət edir və ehtiyac olduğu müalicəni alır. Xaricdə böyük vəsait bahasına başa gələn tibbi müayinələr ölkəmizdə pulsuz yerinə yetirilir. Sağlamlığımıza belə qayğı göstərildiyi üçün ilk növbədə, Prezidentimizə minnətdarıq”.

Şəhər 1 nömrəli tam orta məktəbin Əməkdar Müəllimi Mirqabil Hüseynov, Seybətin kənd tam orta məktəbin müəllimi Aytəkin Əzimova da kütləvi pulsuz tibbi müayinələrin təşkilinə görə dövlətimizin başçısına minnətdarlıqlarını ifadə ediblər.

Masallı Rayon Mərkəzi Xəstəxanasının baş həkimi Cəlil Nəzərovun verdiyi məlumata görə, ötən beş gündə rayonda 4 minə yaxın vətəndaş tibbi müayinədən keçib. Müayinədən keçənlərin 25 nəfəri stasionar, 284 nəfəri ambulator müalicəyə cəlb olunub, 17 nəfəri müalicə üçün Bakının tibb ocaqlarına göndərilib.

EMTV.AZ