SON DƏQİQƏ

“Strateji Yol Xəritəsi həm ortamüddətli, həm də uzunmüddətli tədbirləri özündə əhatəli şəkildə əks etdirib. Yol xəritəsinin işlənib hazırlanması 2016-cı ilin ən mühüm nəticələrindən biridir”

Bunu deputat Əli Məsimli yerli mətbuata açqlamasında deyib.

Deputatın fikrincə, nəzərdə tutulan islahatlar davam edəcək: “2016-cı ildə Yol Xəritəsi ilə yanaşı əsas istiqamətlərini həyata keçirməkdən ötrü həm prezident tərəfindən bir sıra vacib fərmanlar və sərəncamlar verildi, həm də Milli Məclis tərəfindən bir sıra qanunlar qəbul edildi.

2017-ci ildə Yol Xəritəsində nəzərdə tutulan, eyni zamanda prezidentin fərman və sərəncamlarında da konkretləşdirilən istiqamətləri həyata keçirmək, islahatları genişləndirmək üçün çox yaxşı bir baza formalaşıb”.

Deputat icra hakimiyyətlərinin ləğvi məsələsinə də aydınlıq gətirib. Onun sözlərinə görə, Azərbaycanda idarəetmənin keyfiyyətinin yaxşılaşıdırılması üçün radikal addımlar atılmalıdır: “Bu məsələyə münasibət bildirmək bir qədər tezdir.

Ancaq radikal addımlar atılmalıdır. Hesab edirəm ki, birinci növbədə bələdiyyə institutunun yerli icra hakimiyyətləri institutundan önə çıxması istiqamətində zəruri proses başlamalıdır.

Çünki indi yerli icra hakimiyyətləri ilə bələdiyyələr arasında münasibətlər sovet dövründəki “Raykom”la “İspalkom”adlanan icrayə komitəsinin münasibətlərindən də çox cılız və səmərəsiz qurulub.

Bir sıra bələdiyyələrin kifayət qədər effektli fəaliyyətini nəzər almaq şərtilə onların statusu və fəaliyyəti genişləndirilə bilər. Bütün dünyada bu sistem özünü doğruldub. Bələdiyyə torpaqlarından istifadə ilə bağlı bir sıra ciddi çatışmamazlıqlar var”.

Emtv.az