SON DƏQİQƏ

“Azərbaycan Media Qrup” təşkilatının rəhbəri, jurnalist Vüqar Ağayev vətəndaşlara özünü “Çexiya səfirliyinin diplomatı” kimi təqdim edib.

Emtv.az xəbər verir ki,bu barədə yerli mətbuata hüquq-mühafizə orqanlarından məlumat daxil olub.

Paytaxt polisi bir neçə nəfərin şikayəti əsasında V.Ağayevi axtarır. Zərərçəkənlərin şikayət ərizələrinə görə, jurnalist özünü Çexiyanın Azərbaycandakı səfirliyinin əməkdaşı kimi təqdim edib və müəyyən məbləğ qarşılığında onları işlə təmin edəcəyinə söz verib.

Onun sözünə aldananlar V.Ağayevin göstərdiyi bank hesabına pul köçürüb. V.Ağayev onları əmin edib ki, hesaba köçürülən vəsaitləri birbaşa olaraq işə düzəldən şəxs nağdlaşdırır, o isə sadəcə vasitəçidir.

Qeyd edək ki, ötən il də V.Ağayevin dələduzluq əməlləri barədə mətbuatda yazılar dərc edilmişdi. Bildirilirdi ki, o, “Space” telekanalında vacib bir şəxs olduğunu bildirərək, gənc xanımları “mavi ekranın ulduzlarına” çevirməyə söz verib. Onun 6-7 ay ərzində 500-dən çox adamı aldatdığı deyilirdi.

V.Ağayevin əvvəllər “ARB” telekanalında layihə gerçəkləşdirdiyi də bəlli olub.

Emtv.az xəbər verir ki,yerli mətbuata verilən məlumata görə, V.Ağayev çoxdandır ki, telekanalda işləmir, onun hazırda harada olduğunu heç kim bilmir.

Hüquq-mühafizə orqanları əməkdaşlarının sözlərinə görə, onlarda V.Ağayevi cinayət məsuliyyətinə cəlb etmək üçün kifayət qədər dəlil var. Ancaq o hələlik azadlıqdadır.

Nəzrin Abbaszadə
Emtv.az