SON DƏQİQƏ

Həkimin öz peşəsinə vicdanla yanaşması, xeyirxahlığı, xəstələrin müalicəsi və diaqnostikasında kliniki və deontoloji əsaslandırması müalicənin mühüm şərtləri sırasındadır.

Emtv.az xəbər verir ki, Naxçıvan Dövlət Universitetinin (NDU) mətbuat şöbəsindən bildirilib ki, bu barədə ali təhsil ocağında Naxçıvan Muxtar Respublikası Səhiyyə Nazirliyi ilə birgə “Həkimlərin etik davranış qaydaları” mövzusunda keçirilən konfransda söhbət açılıb.

Universitetin rektoru, AMEA-nın müxbir üzvü Saleh Məhərrəmov konfransda çıxış edərək, muxtar respublikada səhiyyənin müasir vəziyyəti və inkişafı istiqamətində görülən tədbirlərdən danışıb.

Naxçıvan Muxtar Respublikası səhiyyə nazirinin müavini Samrat Gəncəyeva “Tibb fakültəsi: tələbələr və həkim deontologiyası” adlı məruzəsində bildirib ki, əhalinin sağlamlığının qorunmasında həkimin peşəkar fəaliyyətinin böyük rolu var. Buna görə də həkimlərin fəaliyyətinin səmərəliliyinin artırılması, onların ictimai etimadının yüksəldilməsi üçün etik davranış qaydalarının müəyyən olunması vacib və əhəmiyyətli məsələlərdən biridir.

“Həkimlərin etik davranış qaydaları” adlı məruzə ilə çıxış edən Naxçıvan Muxtar Respublikası Səhiyyə Nazirliyinin şöbə rəisi Səmayə İbrahimova qeyd edib ki, bu il iyunun 29-da Naxçıvan Muxtar Respublikası səhiyyə nazirinin əmri ilə “Həkimlərin etik davranış qaydaları” təsdiq edilərək icraya götürülüb və bu qaydalar səhiyyə qanunvericiliyini, insan hüquqlarını, demokratik prinsipləri və ümumi etik davranışları rəhbər tutur.

Naxçıvan Muxtar Respublikası Tibbi-Psixi Dispanserin baş həkimi Rəşadət Nabatov “Tibbi etika: qayda və prinsiplər” və universitetin müalicə işi ixtisası üzrə VI kurs tələbəsi Əminə Seyidzadə “Həkim-xəstə və həkim-cəmiyyət arasındakı münasibətlərdəki etik münasibətlər” mövzularında məruzə ediblər.

Konfransın sonunda universitet tərəfindən Naxçıvan Muxtar Respublikası Tibbi-Psixi Dispanserin baş həkimi Rəşadət Nabatova və tələbələrə sertifikatlar təqdim olunub.

Emtv.az