SON DƏQİQƏ

Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il 27 iyul tarixli Sərəncamının icrası ilə əlaqədar olaraq Naxçıvan Müəllimlər İnstitutunda tələbələrlə görüş təşkil edilib.

Emtv.az Azərtac-a istinadən xəbər verir ki, tədbirdə institutun rektoru, professor Oruc Həsənli çıxış edərək, həmin sərəncamın imzalanmasından sonra muxtar respublikanın Təhsil Nazirliyi tərəfindən görülən işlərin gənc müəllim kadrların yetişdirilməsinə verdiyi töhfədən danışıb.

Naxçıvan Muxtar Respublikasının təhsil naziri Məmməd Qəribov Naxçıvan Müəllimlər İnstitutu ilə əməkdaşlıq çərçivəsində görülən işlərdən söz açıb, nazirliyə hamiliyə verilmiş ixtisaslarda təhsil alan tələbələr üçün bütün imkanların səfərbər olunduğunu bildirib.

Təhsil naziri qeyd edib ki, kənd yerlərindəki təhsil müəssisələrində yeni əmək fəaliyyətinə başlayan gənc mütəxəssislər üçün bir sıra güzəştlər, stimullaşdırıcı tədbirlər müəyyənləşdirilib. Belə ki, pedaqoji profilli ali və orta ixtisas təhsili müəssisələrini bitirən, kənd yerlərindəki təhsil müəssisələrində yeni əmək fəaliyyətinə başlayan və 3 il müddətində bu fəaliyyəti davam etdirən 35 yaşadək olan mütəxəssislər kommunal xidmətlərin haqqını ödəmək üçün 60 manat, rayon mərkəzindən 20 kilometrdən artıq məsafədə yerləşən ümumtəhsil müəssisələrində əmək fəaliyyətinə başlayan hər bir nəfər üçün 3 il müddətində əməkhaqqına hər ay 100 manat məbləğində əlavələr ödənilir. Üçillik müddət bitdikdən sonra həmin və ya digər kənd məktəbində pedaqoji fəaliyyətini davam etdirən gənc mütəxəssislərə daha 2 il müddətində əməkhaqqına kompensasiya əlavə olunur. Eyni zamanda, iş yerlərinə göndəriş almış gənc mütəxəssislərə yol xərci, əmlakın daşınması üçün nəqliyyat xərci və ilkin yaşayış şəraitinin yaradılması məqsədilə əməkhaqqının 2 misli həcmində birdəfəlik yardım ödənilir.

Qeyd olunub ki, gənc kadrların işlə təminatı üçün muxtar respublikada dövlət qulluğuna qəbul imtahanları, eləcə də əmək yarmarkaları keçirilir. Naxçıvan Muxtar Respublikası Ali Məclisi Sədrinin tapşırığı ilə keçirilən ənənəvi təhsil yarmarkası muxtar respublikanın, xüsusən də ucqar kəndlərin ümumtəhsil məktəblərinin pedaqoji kadrlara olan tələbatının ödənilməsində mühüm rol oynayır. Ötən müddət ərzində yüzlərlə gənc bu təhsil yarmarkasında iştirak edib və göndəriş alaraq bu gün də müəllim kimi fəaliyyət göstərir.

Vurğulanıb ki, müvafiq ixtisasların Təhsil Nazirliyinə hamiliyə verilməsi yüksək səviyyəli pedaqoji kadr hazırlığına böyük töhfədir. Bu baxımdan həmin tələbələrin orta məktəblərdə təcrübə keçmələri təqdirəlayiq haldır. Təcrübə müddətində tələbələrə nazirlik, müvafiq təhsil şöbələri, eləcə də orta məktəblərin kollektivləri hərtərəfli kömək göstərirlər. Əminliklə demək olar ki, Naxçıvan Müəllimlər İnstitutunun tələbələri gələcəkdə muxtar respublikanın təhsil ocaqlarında fəaliyyət göstərməklə bərabər, dövlət qulluqçusu kimi də səmərəli iş və yüksək bacarıq nümayiş etdirə biləcəklər.

Emtv.az