SON DƏQİQƏ

Yeni Azərbaycan Partiyası Şərur Rayon Təşkilatının Şura iclası keçirilib.

Emtv.az azərtac-a istinadən xəbər verir ki, yığıncaqda bu ilin ötən altı ayında görülmüş işlər və qarşıda duran vəzifələr barədə təşkilatın sədri, Naxçıvan Muxtar Respublikası Ali Məclisinin deputatı Əmir Babayev məruzə edib.

Qeyd olunub ki, bu müddətdə təşkilatın şura və idarə heyətinin üzvləri müntəzəm olaraq ərazi ilk təşkilatlarında olub, partiya üzvləri və sakinlərlə görüşüb, onların problem və qayğıları ilə maraqlanıblar. Məruzə ətrafında müzakirələrdə YAP rayon təşkilatı Gənclər Birliyinin sədri Mirkərim Seyidov, İbadulla və Cəlilkənd ərazi ilk partiya təşkilatlarının sədrləri Baxşəli Abdullayev, Günel Babayeva çıxış ediblər.

İclasda çıxış edən Yeni Azərbaycan Partiyası Naxçıvan Muxtar Respublika Təşkilatının icra katibi, Muxtar Respublika Ali Məclisinin deputatı Anar İbrahimov qeyd edib ki, təşkilatda ideoloji işin və onun metodlarının daim təkmilləşdirilməsi, partiyaya daha çox gənclərin cəlb olunması, təbliğat-təşviqat işlərinin günün tələbinə uyğun qurulması, potensialdan düzgün istifadə və onun qorunması bundan sonra da qarşıda duran əsas hədəf olmalıdır.

Şura iclasında təşkilatı məsələyə baxılıb, rayon İcra Hakimiyyətinin başçısı Kamal Camal oğlu Cəfərov Yeni Azərbaycan Partiyası Şərur Rayon Təşkilatının Şura və İdarə heyətinin üzvü seçilib.

Qeyd edək ki, bu gün Yeni Azərbaycan Partiyası Şərur Rayon Təşkilatının tərkibindəki 87 ilk təşkilatda 10 min 370 nəfər partiya üzvü var. Partiya üzvlərinin 3 min 15 nəfərini, 29 faizini qadınlar, 3 min 138 nəfərini, yəni 30 faizini gənclər təşkil edir. Bu ilin altı ayı ərzində partiya sıralarına qəbul edilən 53 nəfərin 50-si gənclər, 21-i qadınlardır. Əmir Babayev çıxışının sonunda bildirib ki, qarşıdan Yeni Azərbaycan Partiyası yaradılmasının 25 illiyi gəlir. Bununla əlaqədar rayon təşkilatının hazırladığı plana uyğun olaraq müxtəlif tədbirlər keçirilməsi nəzərdə tutulur.

Emtv.az