SON DƏQİQƏ

Ulu öndər Heydər Əliyevin ölkənin ictimai-siyasi, iqtisadi cəhətdən ağır və mürəkkəb dövründə nümayiş etdirdiyi cəsarəti, siyasi müdrikliyi, uzaqgörənliyi sayəsində taleyüklü qərarlar qəbul olunub, siyasi-iqtisadi sabitlik bərqərar edilib, Azərbaycan dinamik inkişaf yoluna qədəm qoyub.

"EMTV.az" Naxçıvan Dövlət Universitetinin mətbuat şöbəsinə istinadən xəbər verir ki, bu fikirlər ali təhsil ocağının nəzdindəki Heydər Əliyev Universitetinin “Ulu öndər Heydər Əliyev və müasir Azərbaycan” mövzusuna həsr olunmuş növbəti - 205-ci lektoriyasında səsləndirilib.

Məşğələni giriş sözü ilə açan rektor, AMEA-nın müxbir üzvü, professor Saleh Məhərrəmov dünya şöhrətli siyasi xadimin doğma Azərbaycana göstərdiyi əvəzolunmaz xidmətlərindən bəhs edib.

Azərbaycan tarixi kafedrasının müdiri, tarix elmləri doktoru, professor Zəhmət Şahverdiyev “Heydər Əliyev və Azərbaycanın müstəqilliyi” adlı məruzəsində bildirib ki, Heydər Əliyevin ölkəyə ilk rəhbərliyi dövründə Azərbaycan sürətlə inkişaf edərək 13 il ərzində keçmiş Sovet İttifaqında ən qabaqcıl yerlərə yüksəlib. Məhz həmin illərdə müasir sənaye komplekslərinin yaradılması, kənd təsərrüfatının inkişafı prosesi sürətlə gedib. Azərbaycan mədəniyyət, incəsənət sahələrində də öz sözünü deyib.

Qeyd olunub ki, Ulu Öndərin 1993-cü ildə xalqın təkidi ilə yenidən siyasi hakimiyyətə qayıdışı ilə Azərbaycanda sabitlik təmin edilib, vətəndaş müharibəsinin qarşısı alınıb, qeyri-qanuni silahlı birləşmələr tərksilah olunub və milli dövlətçiliyin əsasları qoyulub. Bu gün Ümummilli Liderin siyasi kursu Prezident İlham Əliyev tərəfindən uğurla davam etdirilir, müstəqil dövlətimiz özünün ən uğurlu dövrünü yaşayır.