SON DƏQİQƏ

Quran və hədislərimiz həqiqi möminin sifətlərini bizə tanıtmışdır və hansı əməlin daha fəzilətli olduğunu vurğulamışdılar.

Mömin üçün ən zəruri sifətlərdən biri budur ki, imanı güclü olsun və bu iman sayəsində haramlardan çəkinib, vacibatları yerinə yetirsin.

Həqiqi mömin o kəsdir ki, Quranın əmr etdiyi vacibatları yerinə yetirər və haram buyurduqlarından uzaq olar.

Mömin əgər ali dərəcəyə çatmaq istəyirsə, vacibatları yerinə yetirməklə yanaşı, müstəhəb əməllərə də üz tutmalıdır. Həmçinin, xeyir əməllər yerinə yetirməlidir.

Allah Təala Quranda buyurur: "Şübhəsiz, insan, (ömrünün azalması, puç olması və nəfsi istəklərinin və şeytanın ona qalib gəlməsi baxımından) ziyan içindədir. Yalnız iman gətirib saleh əməllər edən, bir-birinə haqqı (sabit doğru əqidə və əməlləri) və (vəzifələri yerinə yetirməkdə) səbri tövsiyə edənlərdən başqa". ("Əsr" 2-3).

Yəni, həqiqi mömin imanla bərabər saleh əməl yerinə yetirməlidir. O cümlədən namazı, orucu, zəkatı, xümsü, yoxsullara yardım etməyi ilk sırada qərar verməlidir.

Bu surənin 3-cü ayəsində iki əmələ əmr olunmuşdur: haqqa dəvət etmək və səbirə dəvət etmək. Haqqa dəvət dedikdə, bir çox əməl nəzərdə tutula bilər, o cümlədən əmr-be-məruf və nəhy-əz-munkər kimi. Səbrə dəvət dedikdə də, bir çox əməl zehnə gəlir. O cümlədən, başqalarına müsibət baş verən zaman, səbirli olmasını tövsiyə etmək kimi.

Qurana nəzər salsaq, görərik ki, bəzən səbir sözü oruca da şamil olur.

Emtv.az yerli mətbuata istinadən bildirir ki, hər bir insan üçün həyatında günah zəminələri hazır olar.

Əgər insan bu günahdan özünü saxlayar və səbir edərsə, bu da həmin ayənin demək istədiyi səbir mənasını verə bilər.

Bir sözlə, mömin bu səbri ilə həqiqi möminliyin ən ali dərəcəsinə çata bilər.

Həzrət Yusif (ə) Züleyxanın günaha dəvətindən sonra səbir etdiyi üçün, Misirin əzizi vəzifəsinə qədər ucalır.

Ona görə də deyə bilərik ki, həqiqi mömin ilk növbədə vacibatları yerinə yetirib, haramlardan çəkinməlidir. Təqvasını və imanını artırıb, müstəhəb və xeyir əməllər görərək, Allaha yaxınlaşmalıdır.

Adətən Allah Quranda bəndələrinə iki cür xitab edir:

1. Ya əyyuhəl-ləzinə amənu.

2. Ya əyyuhən-nas.

Birinci xitab - möminlərə və ikinci xitab - ümumi insanlara şamil olar.

Mömin üçün həyat çətinlikləri həmişə həll olar, çünki Allaha təvəkkül edər və Ondan yardım istəyər. Yaxşı bilir ki, dünyada olan hər bir şey Allahın hakimiyyəti altındadır və Onun iradəsi olmadan, heç bir hadisə baş verə bilməz. Nəticədə Allaha təslim olar və bütün qəlbi ilə Ona bağlanar.

Halbuki, adi insanlar çətinliklərə dözə bilmirlər. Onlar üçün bu çətinliklər yaşama həvəsini aradan aparar. Ona görə də əksər hallarda intihara əl atarlar.

Ümid edirik ki, Allah bütün bəndələrini həqiqi möminlərindən qərar verər və möminlər də iman və təqvası ilə bu məqamı qoruyub saxlaya bilərlər.

"Peyğəmbərimiz Rəbbi tərəfindən ona nazil olana iman gətirdi və möminlər hamılıqla Allaha, Onun mələklərinə, kitablarına, elçilərinə (peyğəmbərlərə) iman gətirdilər (və dedilər): "Onun elçilərinin heç biri arasında fərq qoymuruq".

Həmçinin dedilər: "Eşitdik və itaət etdik; ey Rəbbimiz, Sənin bağışlamanı diləyirik; (hamının) qayıdış(ı) Sənə tərəfdir!"". ("Bəqərə" 285).

"Allah möminlərin yardımçısı və başçısıdır". ("Ali-İmran" 68).

Aysu Əliyeva,
Emtv.az