SON DƏQİQƏ

Babək rayonunun Nehrəm kəndindəki “Xalaoğlu” kəndli-fermer təsərrüfatında yeni plastik tara istehsalı sahəsi fəaliyyətə başlayıb.

Emtv.az yerli KİV-ə istinadən xəbər verir ki, bu münasibətlə keçirilən tədbirdə Naxçıvan Muxtar Respublikasının iqtisadiyyat naziri Famil Seyidov və Babək Rayon İcra Hakimiyyətinin başçısı Rasim Hüseynov çıxış edərək, dövlətimizin sahibkarlara göstərdiyi diqqət və qayğıdan danışıblar. Qeyd edilib ki, muxtar respublikada həyata keçirilən iqtisadi siyasətin əsas istiqaməti əlverişli sahibkarlıq və biznes mühitinin formalaşdırılması, sakinlərin rifah halının yaxşılaşdırılması, yeni istehsal müəssisələri yaratmaqla məşğulluq probleminin həlli, əhalinin tələbatının maksimum səviyyədə daha keyfiyyətli yerli istehsal məhsulları hesabına ödənilməsindən ibarətdir.

Yeni yaradılan istehsal müəssisəsi ilə tanışlıq zamanı sahibkar Rafiq Əliyev məlumat verib ki, müəssisə muxtar respublikada plastik taralara olan tələbatı ödəməklə yanaşı, həm də ixrac imkanlarına malikdir.

Bildirilib ki, burada bütün növ plastik taraların istehsalı üçün lazımi avadanlıqlar quraşdırılıb. Müəssisənin gündəlik istehsal gücü saatda 5 min taradır. Dövlət maliyyə dəstəyi ilə yaradılan müəssisə əlavə olaraq respublikamızın digər bölgələrindən də sifarişlər qəbul edir. Fəaliyyətə az bir müddətdə başlamasına baxmayaraq artıq Gəncə, Quba və Sumqayıt şəhərlərindən taraların sifarişləri qəbul olunub. Müəssisə bütün növ plastik taraların istehsalı imkanına malikdir.

Qeyd olunub ki, Nehrəm kəndində plastik tara istehsalı müəssisəsinin yaradılması dövlətin sahibkarlığın inkişafına verdiyi dəstəyin bariz nümunəsi olmaqla, rayonda təsərrüfat imkanlarını daha da genişləndirəcək.

İsmayil İsmayilov
Emtv.az