SON DƏQİQƏ

Türkiyənən məşhur aktyoru Tamer Karadağlı Musiqili Teatrda Bu günlərdə Bakıya qonaq gələn Türkiyənin məşhur aktyoru, əslən Azərbaycandan olan Tamer Karadağlı Azərbaycan Dövlət Musiqili Teatrında olub.

Emtv.az xəbər verir ki, Teatrın Mətbuat xidmətindən bildirilib ki, ölkəmizdə də kifayət qədər populyar olan ünlü sənətçini istedadlı azərbaycanlı aktrisa, İstanbul Bələdiyyəsi Şəhər Teatrları Bədii rəhbərinin müavini Məlahət Abbasova müşaiyət edib.

Mötəbər qonaqları Azərbaycan Dövlət Musiqili Teatrının direktor müavini Hüseyn Hüseynov qəbul edib. Səmimi və işgüzar şəraitdə keçən görüşdə iki qardaş ölkə arasındakı mədəni əlaqələrdən söhbət açılıb, bir sıra yaradıcı təkliflər səsləndirilib.

Daha sonra H. Hüseynov qonaqları teatrın inzibati binası ilə tanış edib. O, qonaqlara Musiqili Teatrın tarixi, ölkə Prezidenti cənab İlham Əliyevin sərəncamı ilə aparılan möhtəşəm təmir işlərindən sonra burada tamaşaçılar və teatrın kollektivi üçün yaradılmış şərait haqqında ətraflı məlumat verib.

Azərbacan tamaşaçılarının “Cocuklar duymasın” məşhur Türkiyə serialından yaxşı tanıdığı Tamer Karadağlı teatrda yaradılmış şəraitin çox yüksək səviyyədə olduğunu bildirib. T. Karadağlı Azərbaycan Dövlət Musiqili Teatrı kimi çağdaş dünya standartlarına tam cavab verən bir səhnəni görəndən sonra öz heyrətini və məftunluğunu gizlədə bilməyib: “Bu əzəmətli bina, bu möhtəşəm səhnə, bu bənzərsiz şərait insanda yalnız yaradıcılıq şövqü və xoş hisslər yaradır. Yəqin ki, buradakı təəssüratlarımı uzun müddət unuda bilməyəcəyəm. Mən bir çox ölkələrdə, bir çox teatrlarda olmuşam. Səmimiyyətimə inanın, heç bir yerdə belə gözəl, möhtəşəm teatr binası görməmişəm. Adam gözlərinə inana bilmir, adama elə gəlir ki, sanki nağıllar aləmindədir”, – deyə məşhur aktyor Tamer Karadağlı heyranlığını ifadə edərək söyləyib.

Emtv.az