SON DƏQİQƏ

Çindən Avropaya yüklər 12-15 gün ərzində çatdırılacaq.

Bakı-Tbilisi-Qars dəmir yolunun (BTQ) açılış mərasimi iyun ayının sonunda Türkiyə prezidenti Rəcəb Tayyib Ərdoğanın iştirakı ilə keçiriləcək.

Bunu Türkiyənin nəqliyyat, dənizçilik və rabitə naziri Əhməd Arslan deyib.

Nazirin sözlərinə görə, BTQ dəhlizi Avropa ilə Çin arasında fasiləsiz dəmir yol əlaqəsini təmin edəcək.

O vurğulayıb ki, bu dəmir yolu vasitəsilə Çindən Avropaya yüklər 12-15 gün ərzində çatdırılacaq.

Bakı-Tbilisi-Qars dəmir yolu bağlantısı layihəsinin reallaşması məsələsi Azərbaycan, Gürcüstan, Türkiyə hökumətləri və dəmir yolları rəhbərlərinin diqqət mərkəzindədir. Bu, hər üç ölkənin, eyni zamanda, həmin nəqliyyat dəhlizinin xidmətlərindən istifadə etmək marağında olan başqa ölkələrin də sıx nəqliyyat əlaqələri qurmasına böyük imkanlar açacaq.

2017-ci ilin ortalarında Bakı-Tbilisi-Qars (BTQ) dəmir yolunun açılması ilə Azərbaycanın dövlət büdcəsinə daxil olacaq məbləği artırmaq da mümkündür. BTQ ilə 15 milyon tona yaxın Çindən, 10 milyon ton isə Qazaxıstandan gələn yükə tranzit xidməti göstəriləcəyi ehtimal edilir.

"Azərbaycan Dəmir Yolları" QSC-dən İstiPress-ə verilən məlumata görə, proqnozlar göstərir ki, bu dəmir yolu xətti vasitəsilə ilk illərdə 5 milyon ton, növbəti illərdə isə 15 milyon tona qədər yükün daşınması mümkün olacaq.

Xatırladaq ki, 21 noyabr 2007-ci ildə Gürcüstanın Tetri-Skaro rayonunda - Marabda stansiyasında Bakı - Tbilisi - Qars dəmir yolu bağlantısının Gürcüstan hissəsinin, 24 iyul 2008-ci ildə isə Türkiyənin Qars şəhərində Bakı - Tbilisi - Qars bağlantısının Türkiyə hissəsinin tikintisinə start verilib.

Emtv.az