SON DƏQİQƏ

Azərbaycan Respublikası Mərkəzi Bankında “İşçi məqalələri silsiləsi”nin elektron nəşrinə başlanılıb.

"EMTV.az" xəbər verir ki, Mərkəzi Bank aparılan tədqiqat işlərinin elmi ictimaiyyətə çatdırılmasını daim diqqət mərkəzində saxlayır. Belə ki, hazırda bankda aparılan tədqiqat işlərinin nəticələrinin yayımlanması məqsədilə “Mərkəzi Bank və İqtisadiyyat” və “Tədqiqat Bülleteni” kimi elektron dövri nəşrlər mövcuddur.

Bununla yanaşı, qabaqcıl mərkəzi bankçılıq təcrübəsinə uyğun olaraq Mərkəzi Bankda analitik-tədqiqat işlərinin kommunikasiyası sisteminin təkmilləşdirilməsi məqsədilə “İşçi məqalələri silsiləsi”nin də elektron nəşrinə başlanılıb.

Qeyd edək ki, beynəlxalq təcrübədə olduğu kimi “İşçi məqalələri silsiləsi” bitmiş elmi nəşr hesab olunmur və elmi işlərlə bağlı yalnız ilkin nəticələrin müzakirəsinin təşviqi məqsədini daşıyır. Burada nəşr edilən tədqiqat işləri müvafiq akademik dairələrdə aparılan müzakirələrin nəticəsi nəzərə alındıqdan və təkmilləşdirildikdən sonra elmi jurnallarda nəşrə qəbul edilir.

Bu səbəbdən “İşçi məqalələri silsiləsi”nin nəşrində əsas məqsəd tədqiqatın ilkin nəticələrinin ardıcıl kommunikasiyası, elmi müzakirələrdə fəallığın daha da artırılması, həmçinin yerli və xarici tədqiqatçılar arasında fikir mübadiləsi ənənəsinin vahid platformasının yaradılmasından ibarətdir. Buna uyğun olaraq “İşçi məqalələri silsiləsi”ndə verilmiş tədqiqat işləri yerli, həmçinin xarici rəy və təkliflər nəzərə alındıqdan sonra onun tanınmış xarici və yerli elmi jurnallarda nəşr imkanları genişlənəcək.

Belə faydalı təcrübənin mövcudluğu Mərkəzi Bankda analitik və tədqiqat işlərinin ictimaiyyətlə kommunikasiyasının yaxşılaşdırılmasına, iqtisadi maarifləndirmənin artırılmasına, həmçinin ölkədə tədqiqat işlərinin müzakirəsinin inkişafına mühüm dəstək verəcək.