SON DƏQİQƏ

Azərbaycanda “donuz qripi”nə yoluxma halları qeydə alınmayıb, mövsümi qripin və digər respirator infeksiyaların səviyyəsi isə son illər ərzində orta illik göstəricini keçməyib.

"EMTV.az" xəbər verir ki, bu barədə Səhiyyə Nazirliyinin mətbuat xidmətinin rəhbəri Liya Bayramova bildirib.

Onun sözlərinə görə, praktiki olaraq bütün sərhədyanı ölkələrdə epidemioloji vəziyyətin gərginləşməsi müşahidə edilir, bu, bizim üçün potensial təhlükə yaradır və profilaktik, müalicəvi və epidemiya əleyhinə xarakterli tədbirlərin həyata keçirilməsi üçün qüvvə və resursların mobilizə edilməsini tələb edir.

“Bu məqsədlə 2015-ci ilin dekabr ayının 8-də respublikanın səhiyyə naziri Oqtay Şirəliyev tərəfindən müvafiq əmr imzalanıb.

Bu əmrə görə, qripə yoluxması şübhəli olan şəxslərin xəstəxanaya yatırılması üçün xüsusi yataqlar, xüsusi hallarda bu tibb müəssisələrində məhdudlaşdırıcı tədbirlər tətbiq ediləcək, dezinfeksiya rejimi gücləndiriləcək. Tibbi personal fərdi müdafiə vasitələri ilə təmin edilib.

Bununla yanaşı, qriplə mübarizədə əsas rol əhaliyə, ölkə vətəndaşlarına məxsusdur.

“Donuz qripi”nin mövsümi qripdən daha ağır keçdiyini bilmək lazımdır. Xəstəlik ürəkbulanma, qaytarma, diareya, güclü baş ağrıları, yüksək temperatur, nəfəs almaqda çətinlik, təngnəfəsliklə müşahidə edilir.

Səhhətdə ağırlıq xəstəliyin 2-3-cü günündə başlayır, adi qrip zamanı isə bu ağırlaşmalar 10-15 gün sonra başlayır. Bu zaman daxili orqanlar, əsasən də ağciyərlər zədələnir”.

Mətbuat xidmətinin rəhbəri qeyd edib ki, xəstəliyin əlamətləri müşahidə edilən zaman dərhal tibbi müəssisəyə müraciət etmək, maskalardan istifadə etmək, şəxsi gigiyena qaydalarına əməl etmək lazımdır.

“Vətəndaşlarımıza qripin olduğu ölkələrə səfərlərdən imtina etmək, insanların çox olduğu və kütləvi-mədəni tədbirlərin keçirildiyi yerlərdən uzaq durmaq tövsiyə edilir”.