SON DƏQİQƏ

Çiçəklənən Ermənistan partiyasının lideri, oliqarx Qagik Çarukyan 2008-ci il martın 1-də İrəvanda baş vermiş qətliamda mühafəzi dəstələrinin iştirakı barədə istintaqa ifadə verib.

Emtv.az yerli mətbuata istinadən xəbər verir ki, bu barədə Ermənistanda nəşr olunan "Jamanak" qəzeti məlumat yayıb.

Qəzetin məlumatına görə, Çarukyan istintaqa ifadəsində mühafizəçilərinin qanlı hadisələrdə iştirak etmədiyini bildirərək, bu barədə yayılmış məlumatı təkzib edib.

Nəşr yazıb ki, bir neçə saat davam edən dindirilmədə Qagik Çarukyan mühafizəçilərinin olaylarda iştirakı və o günlərdə xərclədiyi pullara dair sualları cavablandırıb.

Ermənistan Xüsusi İstintaq Komitəsinin sözçüsü Marina Oqandzanyan bu məlumat haqda jurnalistin sualına cavab verməkdən imtina edib.

Əlavə edək ki, Qagik Çarukyan 2008-ci il martın 1-də İrəvana baş vermiş aksiyalar zamanı dönəmin Ermənistan hakimiyyətinə dəstək verməkdə, etirazçıların üzərinə silahlı mühafizəçi dəstələri göndərməkdə ittiham olunur. İttihamlar sübut olunacağı halda partiya lideri həbs oluna bilər.

Məlum olaylar zamanı keçmiş prezident Robert Köçəryanın əmri ilə etirazçılara odlu silahlardan atəş açılması nəticəsində 20-yə yaxın insan həlak olub.

Onu da əlavə edək ki, Çarukyan keçən il Ermənistanda hakimiyyət dəyişikliyi ilə yadda qalmış qiyamda hazırkı Baş nazir Nikol Paşinyanı dəstəkləsə də, sonradan tərəflər arasında münasibətlər pozulub.


Nəzrin Abbaszadə
Emtv.az