SON DƏQİQƏ

Azərbaycan Prezidenti İlham Əliyevlə Ermənistan Baş naziri Nikol Paşinyan arasında Davosda baş tutan görüşdən sonra ikinciyə qarşı Qarabağ klanının üzvləri tərəfindən kampaniya başladılıb.

Emtv.az xəbər verir ki, başladılan kampaniya çərçivəsində Serj Sərkisyanın rəhbərlik etdiyi Respublikaçılar Partiyasına yaxınlığı ilə seçilən müxtəlif ekspert və siyasətçilər Paşinyanın Əliyevlə görüşünü şübhə altına qoymağa çalışıblar. Qarabağla bağlı sülh danışıqlarından istifadə edən bu şəxslər Paşinyanın nüfuzuna Əliyevlə Davosda olan görüşündən sonra zərbə vurmağa cəhd ediblər.

Belə ki, Feysbuk səhifəsində paylaşım edən erməni politoloq Ayk Martirosyan tərəflər arasında görüşün guya niyə baş tutduğunu anlamadığını deyib:“Bütün bunlarda Ermənistanın faydası nədir? Niyə bununla bağlı informasiya əvvəldən verilmir və ya müzakirələrin məzmunu açıqlanmır? Ter-Petrosyan, Köçəryan və Sərkisyan dövründəki gizliliyin səbəbi bəlli idi. İndi bu yoxdur. Niyə şəffaflıq şəraitində belə şəffaflıq yoxdur? Niyə görüşlər belə aktivdir? Erməni tərəfi nəyə çalışır?”

Serj Sərkisyanın sadiq kadrı və hazırda Respublikaçılar Partiyasının sədr müavini olan Armen Aşotyan isə Paşinyana qarşı yeni tələblər irəli sürüb. Aşotyan hökumətdən Əliyevlə görüş barədə daha ətraflı izahat istədiyini və bunun xalqın tələbi olduğunu deyib.

Maraqlı məqam odur ki, Sərkisyanın hakimiyyəti dönəmində Aşotyan parlamentin Xarici Siyasət Komitəsinə rəhbərlik edib və Qarabağla bağlı hökumətin həyata keçirdiyi siyasətin əsas icraçılarından biri olub. Hazırda Paşinyanı tənqid edən Aşotyan baş nazirdən aşkarlıq tələb etsə də özü Sərkisyan dönəmində niyə Qarabağ danışıqlarıyla bağlı aşkarlığın olmasına aydınlıq gətirməyib.

Qeyd edək ki, dünən Davos forumu çərçivəsində Azərbaycan Prezidenti İlham Əliyevlə Ermənistan Baş naziri Nikol Paşinyan arasında görüş baş tutub. Görüş 1,5 saat davam edib.

Nəzrin Abbaszadə
Emtv.az