SON DƏQİQƏ

Türkiyə prezidenti Rəcəb Tayyib Ərdoğan Tehranda Suriyada siyasi nizamlanma üzrə Astana prosesi çərçivəsində bu ölkədə atəşkəsə qarant ölkələr olaraq Türkiyə, Rusiya və İran liderlərinin Suriya böhranına həsr edilən üçtərəfli sammitindən sonra keçirilən mətbuat konfransında İdlibə dair önəmli açıqlamalar verib.

Emtv.az xəbər verir ki, Türkiyə prezidenti İdlib probleminin Astana sammitinin ruhuna sadiq olaraq həll edilməsinin vacibliyini söyləyib.

Ərdoğanın sözlərinə görə, bu toplantılar Suriyada gəlinən nöqtənin hesabını aparmaq və irəliyə yönəlmiş addımların təsbiti baxımından önəmli fürsətlər verməkdədir: “Biz başqaları kimi geriyə söykənib, yanğını seyr etmək yerinə onu söndürməyin yollarını axtarıb, bunun üçün əlimizdən gələni edirik.”

Türkiyə prezidenti böyük faciələr yaşamış İdlib xalqının yeni fəlakətlərə məruz qalmasını arzu etmədiklərini deyib: “İdlib məsələsi yeni gərginliklərə, yeni sıxıntılara macal vermədən Astana sammitinin ruhuna sadiq olaraq həll edilməlidir”.

Ərdoğan qeyd edib ki, yaxın günlərdə 3 qarant ölkənin təmsilçiləri BMT baş katibinin Suriya üzrə xüsusi nümayəndəsi ilə Cenevrədə yenidən bir araya gələcəklər.

“İdlib, demək olar ki, bütün Suriyanın kiçik bir modeli mövqeyindədir. Burada atılacaq yanlış addımların mənfi nəticələri hər tərəfdə hiss ediləcək” – deyə, Türkiyə preizdenti bildirib.

Ərdoğan 3,5 milyon suriyalı qaçqına sığınacaq verdiklərini deyib: İdlibin hal-hazırda əhalisi 3,5 milyondur. Daha 3,5 milyon insana sığınacaq verməyə gücümüz də yetməz. Bu anda atacağımız addım birlikdə buradan (İdlib) ola biləcək qaçqın axınına mane olmaqdır”.

Sevinc Əlimova,
Emtv.az
Paylaş: