SON DƏQİQƏ

Bütün sahələrdə dərin böhranın hökm sürdüyü Ermənistanda ictimai-siyasi vəziyyət də gərgindir. İşğalçı ölkənin keçmiş prezidenti Serj Sarkisyanın baş nazir vəzifəsinə namizədliyinin rəsmən irəli sürülməsi narazılıqları artırıb. Hökumətə qarşı birləşən qüvvələr müddətsiz etiraz aksiyalarına başladıqlarını bəyan ediblər.

Ermənistanın yeni prezidenti Armen Sarkisyanın sərəncamı ilə aprelin 9-da baş nazir də daxil olmaqla, bütün nazirlər və hökumətin digər üzvləri istefaya göndəriliblər. Baş nazir postuna Serj Sarkisyanın namizədliyi rəsmən irəli sürülüb. Hakim Respublika partiyasına qarşı birləşən qüvvələr bunun əleyhinədir. İrəvanda müddətsiz etiraz aksiyalarına başladıqlarını bəyan edən “Sarkisyanı rədd edək” cəbhəsinin üzvləri, on il ərzində kifayət qədər əzildiklərini açıqlayıblar.

Ermənistan təcrid olunmuş, tullantılarla dolu bataqlığı xatırladır. Emtv.az-ın məlumatına görə , bu barədə isə ABŞ-ın “The Daily Caller” xəbər portalı yazır. Müəllifi Ceykob Kamaras olan məqalədə bildirilir ki, Ermənistanın regiona və dünyaya təhlükə yaradan mövqeyi son günlərdə xüsusilə ön plana çıxıb. Yazıda Erməni Milli Konqresinin üzvü Aram Manukyanın müsahibəsinə geniş yer ayrılıb. Manukyanın sözlərinə görə bütün bu ölkə sanki Qafqazda yoxdur. Belə vəziyyət artıq 20 ildir dəyişmir. Bu illər ərzində tikintisi Ermənistan deyil, Gürcüstan vasitəsilə həyata keçirilmiş Bakı-Tbilisi-Ceyhan neft kəməri, Bakı-Tbilisi-Qars dəmir yolu daxil olmaqla, bir çox layihələrdən kənarda qalmışıq. Bu gün isə Ermənistan “Şimal-Cənub” beynəlxalq nəqliyyat dəhlizindən və Çinin təşəbbüsü ilə həyata keçirilən İpək yolu layihəsindən kənarda qalmaqdadır” -deyə Manukyan qeyd edib. Erməni deputat ölkəsinin Azərbaycan, Gürcüstan və Türkiyənin pioner rolu oynadığı yeni İpək yolu layihəsindən kənarda qalmasından təəssüf hiss keçirir. “Biz sanki regionda yoxuq... Ermənistan iqtisadi mənada dalana dirənib. Ölkəyə heç kəs investisiya qoymur. Ölkədəki korrupsiya vəziyyəti daha da çətinləşdirir. Ermənistan getdikcə artan inflyasiyadan, həmçinin “beyin axını”ndan əziyyət çəkir. Aram Manukyan ABŞ və Ermənistanda yaşayan bir çox həmvətənindən fərqli olaraq hesab edir ki, ölkəsinin birinci və ən başlıca problemi Dağlıq Qarabağ münaqişəsidir. “Belə davam edə bilməz... Bu münaqişə inkişafa mane olur. Bu vəziyyətdən, quyudan çıxmaq lazımdır”- deyə Manukyan əlavə edib.

Emtv.az