SON DƏQİQƏ

Aprelin 7-si və 8-də Naxçıvanqala Tarix-memarlıq Muzey kompleksində keçirilən “Kətə” fesitvalına yekun vurulub.

Emtv.az azərtac-a istinadən xəbər verir ki, festivalda minlərlə şəhər sakini və muxtar respublikaya gələn qonaqlar böyük maraqla iştirak ediblər. Tədbirə qatılan iaişə obyektləri və ailə təsərrüfatının təmsilçiləri Naxçıvana məxsus olan 20 növ kətəni iştirakçılara təqdim ediblər. Naxçıvan dağlarından toplanan faydalı bitkilərdən hazırlanan kətələr elə seyriçilərin gözünün önündə hazırlanaraq təndir və saclarda bişirilib.Təkcə Şahbuz rayonundan festivala 400 kq kətə içliyi olan pencərlər çıxarılıb. Ordubaddan isə bəzi ailə təsərrüfatları kətə bişirmək üçün istifadə edilən 20 növ dağ pencərini sərgiləyiblər. Naxçıvan şəhəri, Şərur, Babək, Culfa, Kəngərli, Sədərk rayonlarında hazırlanan kətələr bir-birindən dadına və bişirilmə texnologiyasına görə fərqlənib. Bu isə Naxçıvanın mətbəxinin zəngiliyindən xəbər verir. Məhz bu məqamlar festifalı daha marqlı edib. Festivalın sonunda “Ən dadlı kətə” nominasiyası üzrə müsabiqənin qalibləri elan olub. Nümayiş olunan məhsullar görünüşünə, çeşid müxtəlifliyi və dadına görə münsiflər tərəfindən müəyyənləşdirilərək, festivalın qalibləri seçiliblər.

Üçüncü yerlərə Babək rayon sakini Rahilə Cəlilova, Kəngərli rayon sakini Pakizə İsmaylova, ikinci yerlərə Naxçıvan şəhər sakini Nazilə Allahverdiyeva, Şahbuz rayon sakini Aygün Mahmudova layiq görülüb. Festivalın qalibi isə Şərur rayon sakini Mirqasım Eminov olub. Qaliblərə diplomlar təqdim edilib.