SON DƏQİQƏ

Tədbirdən sonra “Azərbaycanın səsi” İctimai Birliyinin sədri,
Faiq Əhmədovun təşəbbüsü ilə xeyriyyə aksiyası keçirilmişdir.



Dekabrın 23-də “Azərbaycanın Səsi” İctimai Birliyinin sədri “Müstəqil Lider” jurnalının baş redaktoru, "Heydər Əliyev" və "Azərbaycan Bayrağı" mükafatçısı Faiq Əhmədovun təşəbbüsü ilə 31 dekabr Dünya Azərbaycanlılarının həmrəylik gününə həsr olunmuş tədbir keçirilmişdir.

Emtv.az xəbər verir ki, tədbirə bir çox ictimai və elm xadimləri, tanınmış ziyalılar, mətbuat nümayəndələri də qatılmışlar. O cümlədən tədbirdə iştirak edənlər arasında “Azərbaycanın Səsi” İB-nin sədri Faiq Əhmədovla yanaşı “İdeal Sülhün Təbliği Fondu”nun prezidenti hacı Əlikram Müzəffər, fondun vitse-prezidenti, Xarici Dillər Universitetinin professoru Məhəmməd Teymurlu, fondun vitse-prezidenti, ADMDK-nin üzvü, İraq-Türkmən Ədəbiyyatı və Yazarlar Birliyinin üzvü, şairə, hacı-xanım Aygün Hüseyn, “Dünya Azərbaycanlıları Konqresi”nin vitse-prezidenti Xəzər Emin və digər tanınmış şəxslər də olmuşlar. Yüksək səviyyədə keçirilən tədbir ümumilikdə Azərbaycan dövlətçiliyinə və şəxsən ölkə prezidenti cənab İlham Əliyevin fəaliyyətinə milli-ictimai dəstəyin verilməsi işinin daim genişləndirilməsi və təbliğ olunması məsələsinə həsr olunmuşdur. Çıxış edənlər yekdilliklə bu məsələnin vacibliyini vurğulamış, milli birliyimizin getdikcə daha da möhkəmlənməsi üçün dövlətçilik amallarına sədaqət prinsiplərinin son dərəcə böyük əhəmiyyət kəsb etdiyini xüsusi qeyd etmişlər.

“Azərbaycanın Səsi” İctimai Birliyinin sədri Faiq Əhmədov çıxış edərək bunları demişdir:

Əziz dostlar, hörmətli qonaqlar!

Bildiyiniz kimi, bizim bu tədbirimiz qarşıdan gələn 31 dekabr Dünya Azərbaycanlılarının həmrəylik gününə həsr olunub! Eyni zamanda sabah, dekabr ayının 24-də möhtərəm Prezidentimiz İlham Əliyev cənablarının doğum günüdür. Əlbəttə ki, bu möhtəşəm bayram günlərində hər bir Azərbaycan vətəndaşının müqəddəs borcu bugünkü firavan günlərimizin, inkişaf edən müstəqil dövlətimizin banisi olan, dünya azərbaycanlılarının Ümummilli lideri Heydər Əliyevin ölməz xatirəsini yad etmək, Ulu Öndərin xidmətləri barədə öz ürək sözlərini deməkdir.

Danılmaz bir həqiqətdir ki, Azərbaycanın müstəqillik yolu Ulu Öndər Heydər Əliyevin parlaq zəkasının, onun öz vətəninə, öz xalqına olan tükənməz sevgisinin bir təzahürü olaraq formalaşıb. Hazırda özünün çiçəklənmə dövrünü yaşayan, sürətli və davamlı inkişafı ilə bütün dünyaya örnək olan Azərbaycan bu günlərə çatmaq üçün çətin, keşməkeşli yollar keçib. Xüsusilə ötən əsrin 90-cı illərinin əvvəlində Azərbaycanda son dərəcə ağır siyasi, iqtisadi vəziyyət formalaşmışdı. Heydər Əliyevin ölkəmizə rəhbərlik etmədiyi həmin dövrü birmənalı olaraq daxili çəkişmələrin gücləndiyi, qeyri-sabitlik və tənəzzül dövrü kimi səciyyələndirmək olar.

Demək olar ki, sovet imperiyasının dağılması prosesində keçmiş ittifaq respublikaları arasında ən ağır zərbələri də Azərbaycan almış oldu. Məhz həmin dövrdə torpaqlarımızın 20 faizi işğal edildi, 1 milyondan çox soydaşlarımız öz dədə-baba yurdlarından qovularaq qaçqın və məcburi köçkünlərə çevrildilər. Eləcə də sovet dönəmində yaradılmış iqtisadi sistem dağıdılaraq iflic vəziyyətinə gətirildi. Həmin illərdə Azərbaycan xalqı çox faciələr yaşamalı oldu ki, bütün bunların da başlıca səbəbi ölkədə xalqın inandığı, etimad göstərdiyi bir rəhbərin, insanları arxasınca apara biləcək liderin hakimiyyətdə olmaması idi. Elə hakimiyyətdə olan bu böhran nəticəsində də Azərbaycan artıq vətəndaş müharibəsi ərəfəsinə çatmış, öz müstəqilliyini itirmək təhlükəsi ilə üz-üzə qalmışdı.

Yalnız 1993-cü ilin iyununda xalqın təkidli tələbi ilə Ulu Öndər Heydər Əliyevin ölkə rəhbərliyinə qayıdışıdan sonra Azərbaycan bütün bu fəlakətlərdən qurtulmuş oldu. Ölkənin həm siyasi, həm iqtisadi, həm də mənəvi mühitinə heç kəsin ola bilməyəcəyi qədər dərindən bələd olan Ümummilli lider bundan sonra bütün varlığını Azərbaycanın müstəqil dövlət quruculuğuna həsr etdi. Bütün bunlar bir daha sübut edir ki, məhz Heydər Əliyev Azərbaycan xalqının və dövlətinin xilaskarı olaraq, ölkəmizdə sarsılmaz ictimai-siyasi sabitliyi, milli həmrəyliyi təmin etmiş, Azərbaycanda dinamik inkişafın əsasını qoymuşdur.

Bu gün isə, Ümummilli liderimiz Heydər Əliyevin siyasəti cənab prezident İlham Əliyev tərəfindən uğurla davam etdirilir. Ulu Öndərimizin Azərbaycanın möhtəşəm gələcəyi üçün planlaşdırdığı, nəzərdə tutduğu bütün işlər bu gün də ölkəmizdə böyük müvəffəqiyyətlə davam etdirilir.

Dünyanın bir çox ölkələrində daxili sabitliyin pozulduğu, böyük dağıntılara və insan tələfatına səbəb olan silahlı münaqişələrin yarandığı bir vaxtda, hətta bəzi inkişaf etmiş dövlətlərin belə siyasi və iqtisadi böhranla üzləşdiyi bir dövrdə müstəqil Azərbaycanımızın dinamik inkişaf etməsi son dərəcə qürurverici bir haldır. Azərbaycanın dinamik inkişafının təmin edilməsi, cəmiyyətimizin qarşısında duran vəzifələrin həyata keçirilməsi baxımından artıq yola salmaqda olduğumuz 2017-ci il də bir çox mühüm hadisələrlə yadda qalan olmuşdur.

Prezident İlham Əliyevin rəhbərliyi ilə Azərbaycan dinamik inkişaf edən, demokratik, sosial-iqtisadi sahədə böyük nailiyyətlər qazanmış, yüksək beynəlxalq nüfuza malik ölkəyə çevrilmişdir. Qazanılan uğur və nailiyyətlər xalqımızı daha böyük qələbələrə, zəfərlərə ruhlandırır. Ölkə Prezidentinin yürütdüyü məqsədyönlü, obyektiv reallıqlara istinad edən və ölkənin milli mənafelərini əks etdirən daxili və xarici siyasəti hər bir azərbaycanlının gələcəyə olan böyük inamını və əminliyini daha da möhkəmləndirir.

“Mən bütün Azərbaycan xalqının, hər bir Azərbaycan vətəndaşının Prezidentiyəm. Mənim borcumdur ki, imkan daxilində hər bir vətəndaş inkişafa, yaxşılığa doğru irəliləyişi görsün və onu hiss eləsin...” - deyən dövlət başçımız məhz bu prinsipləri gerçəkliyə çevirmək üçün davamlı olaraq məqsədyönlü və uğurlu fəaliyyət göstərməkdədir.

Hörmətli cənab Prezident!

Fürsətdən istifadə edərək mən, öz adımdan və rəhbərlik etdiyim kollektiv adından Sizi doğum gününüz və qarşıdan gələn Dünya azərbaycanlılarının həmrəylik günü münasibətilə səmimi qəlbdən təbrik edirəm!

Sizə və ailə üzvlərinizə uzun ömür, möhkəm can sağlığı və müstəqil Azərbaycanımız adına yeni-yeni parlaq zəfərlər arzulayırıq! Bizim hamımızın ən böyük arzumuz budur ki, Azərbaycanın möhtəşəm gələcəyi naminə hələ uzun illər bundan sonra da ölkəmizin idarəçilik sükanını Siz öz etibarlı əllərinizdə möhkəm saxlayasınız!

P.S. Qeyd edək ki, tədbirdən sonra “Azərbaycanın səsi” İctimai Birliyinin sədri, “Müstəqil lider” jurnalının baş redaktoru Faiq Əhmədovun təşəbbüsü ilə xeyriyyə aksiyası keçirilmişdir. Aksiyanın gedişində bir neçə aztəminatlı ailəyə ərzaq yardımı olunmuş, hədiyyələr təqdim edilmişdir. Aksiyada İctimai Birliyin üzvləri də aktiv iştirak etmişdilər.

Hazırladı: Türkan, Aysel, Fotolar Oktay və Seymura məxsusdur
Emtv.az





































































<!--TBegin:http://emtv.az/uploads/posts/2017-12/1514307413_26176718_1655942921134999_986513712_n.jpg|left-->