SON DƏQİQƏ

Qaçqınların və Məcburi Köçkünlərin İşləri üzrə Dövlət Komitəsinin ("Qaçqınkom") sədri, baş nazirin müavini Əli Həsənovun nəvəsinə məxsus "Mercedes Galendewagen" markalı avtomibilin ağır qəza törətməsi gündəmin əsas mövzusudur.

Qeyd edək ki, qəza dünən Heydər Əliyev prospektində baş verib. Hadisə nəticəsində 3 nəfər dünyasını dəyişib. Ölənlərdən biri Əli Həsənovun nəvəsi Nail Allahverdiyevin sürücüsü Mehdi Əliyevdir. İlkin məlumatlarda qəzada Nail Allahverdiyevin də dünyasını dəyişdiyi bildirilirdi. Lakin bu iddia təsdiqlənmədi. Daha sonra məlumat yayıldı ki, Əli Həsənovun nəvəsi ağır yaralanıb.

Nail Allahverdiyev Əli Həsənovun qız nəvəsidir.

Bu hadisə cəmiyyətdə geniş rezonansa səbəb olub. Sosial şəbəkələrdə olay harınlığın nəticəsi kimi qiymətləndirilib.

Həmçinin "Qaçqınkom" sədrinin nəvəsinin avtomobilinə diqqət çəkilib. Məcburi köçkünlərin ağır şəraitdə yaşadığına rəğmən onların problemləri ilə məşğul olan bir qurumun sədrinin nəvəsinin bahalı maşında gəzməsi korrupsiyanın təzahürü hesab edilir.

Emtv.az xəbər verir ki, istiqlal.az-a daxil olan məlumatda iddia olunur ki, hadisə hakimiyyətin zirvəsində də qəzəbə səbəb olub. Hökumətin nəzarətində olan media qurumlarının da olaya geniş yer verməsi də bu məlumatın əsassız olmadığı qənaətini yaradır. Nəzərə alsaq ki, qəza Əli Həsənovun nəvəsinə məxsus maşının başqa bir avtomobillə yarışması nəticəsində baş verib, bu halda məsələnin daha böyüyəcəyi təqdirdə Əli Həsənov, yaxud Elçin Quliyev general Novruzəli Orucovun taleyini yaşaya bilər.

Emtv.az