SON DƏQİQƏ

Muxtar respublikada bütün kateqoriyalı torpaqların elektron kadastr uçotu informasiya sisteminin yaradılması və rəqəmsal kadastr xəritəsinin tərtib edilməsi istiqamətində işlər davam etdirilir.

Emtv.az azərtac-a istinadən xəbər verir ki, Şərur və Babək rayonlarının bir neçə kəndində torpaq sahələrinin elektron taxeometr vasitəsilə planlama işləri başa çatıb. Son olaraq Naxçıvan şəhərinin 1-ci və 2ci inzibati ərazi dairələrində və Şərur rayonunun Təzəkənd və Yengicə kəndlərində mülkiyyət növündən və təyinatından asılı olmayaraq bütün torpaq sahələrinin ölçüləri sərhədlərin konfiqurasiyası dəqiqləşdirilib, torpaqların növləri üzrə kəmiyyət və keyfiyyət göstəricilərində baş verən dəyişikliklər müəyyən edilib. Hazırda Naxçıvan şəhərində 3-cü inzibati ərazi dairəsində və Şərur rayonunun Zeyvə-Düdəngə kəndlərində bu istiqamətdə işlər görülür.

Xatırladaq ki, Naxçıvan Muxtar Respublikası Ali Məclisinin Sədri 2 aprel 2016-cı il tarixdə “Naxçıvan Muxtar Respublikasında torpaq münasibətlərinin tənzimlənməsi sahəsində əlavə tədbirlər haqqında” Fərman imzalayıb. Bu Fərmana əsasən 23 fevral 2017-ci il tarixdə Naxçıvan Muxtar Respublikası Nazirlər Kabinetinin müvafiq Sərəncamı ilə dövlət və bələdiyyə mülkiyyətində, habelə xüsusi mülkiyyətdə olan bütün kateqoriyalı torpaqların elektron kadastr uçotu informasiya sisteminin yaradılmasının və rəqəmsal kadastr xəritəsinin tərtib edilməsinin 2020-ci ilədək mərhələlərlə təmin olunmasına dair Tədbirlər Planı təsdiq edilib.Tədbirlər Planına uyğun olaraq Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Komitəsi tərəfindən Torpaqların Elektron Kadastr Uçotu İnformasiya Sisteminin yaradılması və rəqəmsal kadastr xəritəsinin tərtib edilməsi məqsədilə işlər görülür.