SON DƏQİQƏ

Xəbər verdiyimiz kimi, general Novruzəli Orucov dünən Prezident İlham Əliyevin sərəncamı ilə Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidməti rəisinin həqiqi hərbi xidmətə çağırış üzrə müavini vəzifəsindən azad edilib.

Emtv.az xəbər verir ki, N.Orucov unikal.org-a özəl açıqlama verib. O, bildirib ki, İlham Əliyevin onun üzərində zəhmətləri çoxdur: “Siz bilirsiniz ki, məni nəyə görə işdən azad edilmişəm. 3 övladım var. Hər üçünün canı cənab prezidentin ayağının altında qurban etməyə hazıram. Çünki dövlət başçımız mənə yüksək vəzifə və rütbə verdi. Mənim Ali Hərbi Məktəbdə təhsil almağım üçün göstərişi onun atası, Ulu öndərimiz Heydər Əliyev vermişdi. Ümumilli liderimizin və prezident İlham Əliyevin mənim üzərimdə zəhməti çoxdur. İşdən azad olunmağıma gəlincə, cənab prezidentə heç bir iradım yoxdur. Vəzifəni verən də, vəzifədən çıxaran da o kişidir. Allah canın sağ eləsin cənab prezidentin. Bir daha qeyd edirəm ki, mənim canım da, həyatım da, balalarımda cənab prezidentə qurbandır”.

General övladının həbs xəbərindən də danışıb: “Hələlik istintaq gedir. İstintaqın sonunda hər şey bilinəcək.”

Novruzəli Orucov oğlunun törətdiyi cinayətə görə özünü günahkar sayır.
General bildirib ki, Prezident onu daha əvvəl işdən çıxartmalı idi:

“Hadisədir – baş verib, mübahisə yaranıb və sonu da belə olub. Bu məsələdə vəzifəli şəxs kimi mənim də səhvim çox böyük olub, uşağı başlı-başına buraxmışam. Başlı-başına deyəndə ki… Mən özüm atasız böyümüşəm, istəməmişəm ki, uşaqlarım da nəyinsə ehtiyacını çəksinlər. Atam Böyük Vətən Müharibəsinin iştirakçısı olub, 1943-cü ildə yaralanıb gəlmişdi, onu altı yaşımda itirmişəm. Altı uşaq olmuşuq, çox ağır ailə həyatı sürmüşəm. Ancaq böyüdük, oxuduq, hamımız ali təhsil aldıq.

Deyim ki, oğlum birinci hadisəni törədəndə – yəqin ki, məlumatınız var – cənab Prezident, Ali Baş Komandanım mənə çox hörmət elədi, məni o zaman işdən çıxartmalı idi. Açığı, onda özüm də işdən getməyə hazırlaşırdım. Ancaq xidmətlərim nəzərə alındı və işimə davam etməyim məsləhət oldu.

Bilirsiniz ki, mən döyüşçü olmuşam, “DOSAAF”ı yenidən qurmuşam, snayperlər, paraşütçülər, istehkamçılar və kəşfiyyatçılar kursu açdım, xeyli işlər gördüm. Bu xidmətlərimə görə də işimdə saxlanıldım, nəinki “uvolit” olundum, hətta vəzifəm bir pillə artırıldı. Ancaq bu dəfə hadisə ilə bağlı cənab Prezidentə məruzə edilib və o da qərarını verib.

Mən özümdən başqa heç kimdə günah görmürəm. İki oğlum, bir qızım var. Bu, mənim sonbeşiyimdir, bir az ərköyün böyütdük. İdmançı uşaqdır, 1200 metrdən paraşütdən tullanmaq üzrə dünya rekordçusudur. Uşaqla hələ ki, görüşməmişəm. Bu gün günorta ona yemək aparacaqlar, ancaq özüm getməyəcəm.
Mən bir ata kimi, bir general kimi bütün valideynlərə səslənirəm, yeri gələndə övladlarını sıxsınlar, xüsusilə, oğlan uşaqlarına lap bir şillə vursunlar ki, onlar pis hərəkətlər etməsinlər”.

Emtv.az