SON DƏQİQƏ

Azərbaycanlı milli-mədəni fəal, Təbriz sakini Nəsim xanım Sadiqi yaşadığı şəhərin İnqilab Məhkəməsinə çağırılıb.

EMTV.az yerli mətbuata istinadən xəbər verir ki, azərbaycanlı fəal “Tərh-i No” qəzeti türklər haqqında təhqiramiz yazı dərc etdikdən sonra 2016-ci ildə Təbrizdə keçirilən etiraz aksiyasında saxlanılıb. O, ETTELAAT (İran Kəşfiyyat Nazirliyi) təcridxanasında 5 gün saxlandıqdan sonra sərbəst buraxılıb.

Fəal saxlandığı zaman “sistemin əleyhinə təbliğ” və “ölkənin təhlükəsizliyinə qarşı addım atmaq”da ittiham olunub.

Qeyd edək ki, 2016-ci il iyulun 20-də ETTELAAT-a bağlı olan “Tərh-i No” qəzeti 868-ci sayısında türklərə qarşı təqhiramiz yazı dərc edib. Yazıda müəllif Firdovsinin “Şahnamə” əsərindən bir hekayə anladaraq türklərlə bağlı “Ey tanınmaz və bədbəxt türk, iranlı pəhləvanların qüdrətindən xəbərin varmı?! Biz turanlıları kişi kimi tanımırıq, onlar hamısı arvaddır. Ey irqi pis olan türk, sən kişilərlə savaşmaq üçün yaranmayıbsan, get, arvadlar kimi əlinə pambıq və mil götür” – kimi təhqiramiz sözlərdən istifadə edib.

Bu məqalə Güney Azərbaycanın Təbriz, Urmiyə, Zəncan, Marağa, Ərdəbil, Xoy və s. kimi şəhərlərində kütləvi etiraz aksiyalarına səbəb oldu, küçələrdə “Haray,haray, mən türkəm”, “Azərbaycan milləti, çəkməz bu zilləti”, “Yaşasın Azərbaycan” və s. kimi şüarlar səsləndirilib. Dinc aksiyalar təhlükəsizlik qüvvələrinin kobud müdaxiləsinə məruz qalıb, etirazçılardan bir neçəsi döyülərək bədən xəsarətləri alıb, onlarla fəal saxlanılıb.

EMTV.az