SON DƏQİQƏ

Dünən Neft Daşlarında intihar edən geoloq ilə bağlı yeni məlumat var.

EMTV.az yerli mətbuata istinadən verdiyi məlumata görə, Neftçilərin Hüquqlarını Müdafiə Təşkilatı İctimai Birliyinin sədri Mirvari Qəhrəmanlı qeyd edib ki, intihar edən Məmməd Vəliyev ailəli olub və onun iki övladı var:

“Bizdə olan məlumata görə, Neft Daşları mədən geofizika ekspedisiyası nəzarət-interpretasiya dəstəsinin intihar edən rəisi, geoloq Məmməd Vəliyev Hövsanda yaşayırmış. Dünən intihar baş verən zaman evli olan oğlu ailəsi ilə birlikdə Qəbələdə tətildə olub. İntiharın hansı səbəbdən baş verməsi ilə bağlı bir neçə fərziyyə var. Ancaq hələlik araşdırma aparıldığı üçün bir söz demək düzgün olmazdı. Pirallahı prokurorluğu Neft Daşlarında istintaq aparır”.

SOCAR-ın İctimaiyyətlə əlaqələr şöbəsindən də bildirdilər ki, intihar hadisəsi ilə bağlı araşdırma aparılır:

“Araşdırma bitdikdən sonra bununla bağlı mətbuata açıqlama veriləcək”.

Qeyd edək ki, iyulun 9-da təqribən səhər saat 8.15 radələrində Neft Daşlarında Geofizika-Geologiya idarəsinin Neft Daşları mədən geofizika ekspedisiyası nəzarət-interpretasiya dəstəsinin rəisi (geoloq) 1961-ci il təvəllüdlü Vəliyev Məmməd Şəmistan oğlu naməlum səbəblərdən özünü 9 mərtəbəli yataqxananın 9-cu mərtəbəsindəki otağından atıb. Nəticədə, o, dünyasını dəyişib.

EMTV.az