SON DƏQİQƏ

Mərhum nazir Natiq Əliyevin vəfatından sonra Energetika Nazirliyinin SOCAR-a birləşdirilməsi planı sürətlənə bilər.

Emtv.az-ın yerli mətbuata istinadən əldə etdiyi məlumata görə, nazirliyin neft şirkətinə birləşdirilməsi çoxdan nəzərdə tutulurdu.

Amma N.Əliyevin peşəkar və şəffaf fəaliyyətinə görə bu struktur islahatına gedilmirdi. Hətta mərhum nazir yaşasaydı, bu struktur dəyişikliyinin gerçəkləşməsi uzun müddət ertələnə bilərdi.

Taleyin işi elə gətirdi ki, mərhum nazir qəfil dünyasını dəyişdi. İndi onun vəzifələrini müavinləri icra edir. Hələlik nazirlikdə kimin N.Əliyevin yerinə gətiriləcəyi barədə qeyri-müəyyənlikdir.

Çox güman ki, onun 40 mərasimi olandan sonra nazir postuna təyinat olacaq. Amma gələn bilgilər daha çox nazirliyin ləğv edilərək SOCAR-a birləşdiriləcəyini söyləyir. Energetika Nazirliyində də kütləvi ixtisarların olacağı barədə xəbərlər gəlməkdədir.

Nazirlikdən sızan məlumata görə, nazirliyin “Dövlət Enerji Nəzarəti” İdarəsi və “Dövlət Qaz Nəzarəti” İdarəsində ixtisarlar gedəcəyi gözlənilir.

Məlumata görə, bu nazirliyin funksiyalarının bir qisminin Dövlət Neft Şirkətinə (SOCAR) verilməsi, o cümlədən İqtisadi İnkişaf Nazirliyinin bazasında Yanacaq-Energetika Departamentinin formalaşdırılması ideyası gündəmə gəlib.

Postneft dövrünün başlanması artıq bu qurumun lazımsızlığını şərtləndirib. Hakim dairələrdə gedən müzakirələrə görə, bu nazirliyin fəaliyyəti həm büdcəyə israfçılıqdır, həm faydalılıq əmsalı aşağıdır. Bu nazirliyin ləğvi barədə təkliflərdən birini də deputat Zahid Oruc vermişdi.

O, parlamentdə belə deyib: “Energetika Nazirliyi nəyə lazımdır ki? SOCAR onun səlahiyyətlərini yerinə yetirir. Natiq müəllim təcrübəli kadrdır.
Ölkənin neft strategiyasının həyata keçirilməsində mühüm rol oynayıb. Amma indiki durumda ayrıca bir nazirliyə ehtiyac yoxdur”.

Onu da yada salaq ki, Azərbaycanda bir neçə enerji qurumunun birləşdirilməsi təklif olunur.

İddialara görə, “Azəristiliktəchizat” ASC, Alternativ və Bərpa Olunan Enerji Mənbələri üzrə Dövlət Şirkəti, “Azərenerji” ASC, “Azərişıq” ASC, Bakı Enerji Tikinti ASC, "İstilik enerji istehsalat" MMC bir vahid mərkəzə çevrilə bilər. Bu qurumların ayrı-ayrılıqda fəaliyyəti büdcəyə israfçılıq kimi qiymətləndirilib.

Emtv.az