SON DƏQİQƏ

"Azərsığorta" Dövlət Sığorta Şirkətinin Tovuz rayon filialına yeni müdir təyin edilib.

Emtv.az-ın report-a istinadən məlumatına görə, bu vəzifəyə Elnur Süleymanov təyin edilib. E.Süleymanov bundan əvvəl bankların brində filial müdiri vəzifəsində çalışıb.

Xatırladaq ki, bu il aprelin 22-də filialın keçmiş müdiri, 1956-cı il təvəllüdlü Bayramova Raya Nəsrəddin qızının iş otağında meyiti tapılıb. Filialın mühasibi, 1964-cu il təvəllüdlü Vəliyev Vidadi Bəhman oğlu isə müxtəlif dərəcəli bədən xəsarətləri ilə Tovuz Rayuon Mərkəzi Xəstəxanasına yerləşdirilib. O, xəstəxanada yıxılaraq xəsarət aldığını bildirib.

Tovuz Rayon Polis Şöbəsinin və Rayon Prokurorluğunun əməkdaşlarının birgə keçirdiyi istintaq tədbirləri zamanı məlum olub ki, qətlə yetirilən filial müdiri Raya Bayramova idarədə mühasib işləyən Vəliyev Vidadi Bəhman oğlu ilə otaqda mübahisə edib.

Bu zaman V.Vəliyev R.Bayramovanın başını öncə masaya vurub, daha sonra onun baş nahiyəsinə küt alətlə (Otaqda qırmızı kərpic qırıntıları aşkar edildiyindən, onun küt alət qismində kərpicdən istifadə etdiyi ehtimal olunur - red.) bir neçə zərbə endirib. V.Vəliyev onun öldüyünə əmin olduqdan sonra filialın qapısını bayırdan bağlayaraq hadisə yerindən qaçıb.

Məlumata görə, ekspertiza zamanı şübhəli şəxs qismində saxlanılan V.Vəliyev xəstəxanada müalicə olunurmuş. Polisin hadisə ilə bağlı nə bildiyi sualına isə V.Vəliyev belə cavab verib:

"Mən özüm də onun yoxa çıxdığını, ailəsinin onu axtardığını bilirdim. Filiala baxmaq istədim, onun orada olub-olmadığını yoxlamaq üçün, lakin qapı bağlı idi, dama çıxıb ordan içəri keçmək istəyirdim ki, ayağım sürüşdü, yıxılıb başımdan xəsarət aldım".

Lakin istintaq zamanı onun ifadələrində yalan olması və hadisə yerində aparılan araşdırmalar zamanı əldə edilən kifayət qədər fakt, cinayətin onun tərəfindən törədilməsi ehtimalını artırıb və o, saxlanılıb.

Saxlanılan V.Vəliyev sonradan başqa bir ifadəsində Raya Bayramova ilə aralarında mübahisənin pul üstündə düşdüyünü etiraf edib.

Hazırda hüquq-mühafizə orqanları tərəfindən araşdırmalar davam etdirilir.

Emtv.az