SON DƏQİQƏ

Ordubad Rayon Mədəniyyət Evində keçirilən yeniyetmələr arasında “Nuh yurdu” intellektual oyununun Ordubad rayon birinciliyinin qalibləri müəyyənləşib.

Emtv.az xəbər verir ki, birincilik Naxçıvan Muxtar Respublikası Ali Məslisinin Sədri yanında Gənclər Fondunun, Gənclər və İdman Nazirliyinin, Təhsil Nazirliyinin, Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyinin və “Gənclərin İntellektual İnkişaf Mərkəzi” İctimai Birliyinin birgə təşkilatçılığı ilə keçirilib.

Tədbirdə Gənclər və İdman Nazirliyinin şöbə müdiri Tahir Məmmədli çıxış edərək, intellektual oyunun keçirilməsində məqsədin yeniyetmələrin intellektual səviyyəsini, dünyagörüşünü, zehni inkişafını stimullaşdırmaq, onlar arasında bilik və elmin nüfuzunu artırmaq, eləcə də asudə vaxtlarının səmərəli təşkili istiqamətində yeni üsullar tətbiq etməkdən ibarət olduğunu bildirib və komandalara uğurlar arzulayıb.

Səkkiz komandanın iştirak etdiyi, yarımfinal və final mərhələsindən ibarət olan oyunda “Xəzər”, “Qasırğa”, “Qarabağ” və “Danyeri” komandaları finala vəsiqə qazanıblar.

Oyunun yekun nəticəsinə əsasən, Ordubad şəhər internat məktəbinin “Qarabağ” komandası I yerə, Əndəmic kənd tam orta məktəbinin “Danyeri” komandası II yerə, Ordubad şəhər 3 nömrəli tam orta məktəbin “Qasırğa” komandası isə III yerə layiq görülüb.

Qalib gələn komandalara təşkilatçıların kubok, diplom, fəxri fərman və oxunması zəruri olan kitablar külliyyatı təqdim olunub.

Emtv.az