SON DƏQİQƏ

Ermənistanda məktəblər bağlanır. Ermənistan hökuməti Gümrü şəhərində yerləşən 3 saylı məktəbin bağlanmasına qərar verib.

1937-ci ildə tikilmiş Hovanes Tumanyan adına məktəb şagird olmadığından bağlanıb. 2016-2017-ci tədris ilində məktəbdə cəmi 141 şagird olub və onlara 40-a yaxın müəllim dərs keçib. Yəni, bir müəllimə üç şagird düşüb. Məktəbin direktoru Karen Darbinyan “Sputnik Armeniya” portalına bildirib ki, il ərzində məktəbdə şagirdlərin sayı 56 nəfər azalaraq 85-ə düşüb. Azalmaya səbəb məzunlarla yanaşı, aşağı sinif şagirdlərinin də məktəbi tərk etməsi olub. Birinci sinfə isə şagird tapmaq mümkün olmayıb.

Bu da təbii ki, əhalinin Gümrünü və ümumiyyətlə Ermənistanı tərk etməsi ilə bağlıdır. Karen Darbinyan bunun ardınca Gümrünün digər məktəblərinin də bağlanacağını bildirib.

Əslində, bu məsələ ümumiyyətlə Ermənistan üçün yad deyil. Çünki, dövlətin etinadsızlığı nəticəsində onlarla belə məktəb bağlanıb. Məsələ bundadır ki, Ermənistanı tərk edənlərin sayı ildən-ilə artır. İndi Ermənistan rayonları boşalmış kəndlər, tənha qocalardan ibarətdir.

Hakim Respublika Partiyasını təmsil edən deputat Samvel Farmanyan da bildirib ki, Ermənistan artıq qocalmış ölkə sayılır və ölkədən hər il 20-30 min adam köçür. Köçdə əsas rolu Qarabağ münaqişəsi və ondan doğan sosial problemlər oynayır.

Bu isə Sarksiyan hakimiyyətinin iç üzünü bir daha göstərir. Ölkədən qaçan vətəndaşlar isə işsizlik problemini əsas göstərirlər. Təsadüfi deyil ki, 2008-ci ildən bəri 400 mindən çox əhali ölkəni bir dəfəlik tərk edib.

Emtv.az