SON DƏQİQƏ

Ağsu rayonunda oğurluq hadisəsi törədilib və xeyli silah-sursat aşkar edilib. Rayonun Qaraqaşlı kənd sakini Sədaqət Qədirov Ağsu rayon Polis Şöbəsinə müraciət edərək bildirib ki, mayın 10-da gecə saatlarında naməlum şəxslər onun evinin pəncərəsini sındıraraq içəri daxil olub və oradan 200 manat pul, 2 ədəd qızıl üzük oğurlayıblar.

Emtv.az-ın apa-ya istinadən xəbərinə görə, Ağsu rayon Polis Şöbəsinin əməkdaşları tərəfindən keçirilən əməliyyat-axtarış tədbirləri nəticəsində hadisəni törətməkdə şübhəli bilinən şəxslər-Qaraqaşlı kənd sakinləri - 22 yaşlı Şamxal Məmmədov, 28 yaşlı Elçin Abdullayev və 33 yaşlı İlkin Fərəcov tutulub. Onlardan 5 ədəd qumbara, 1 ədəd kustar üsulla düzəldilmiş tapança və 4 ədəd alışdırıcı götürülüb.

Onlar verdikləri izahatda silah-sursatı Sədaqət Qədirovun mənzilindən oğurladıqlarını bildiriblər. Əməliyyat tədbirlərinin davamı olaraq polis əməkdaşları Sədaqət Qədirovun evinə baxış keçirən zaman oradan 25 ədəd pulemyot patronu və 1 ədəd qumbara alışdırıcısı aşkar edərək götürüblər.

Sədaqət Qədirovun qızı Səbuhə Yusifova bildirib ki, oğurluq edən şəxslərə rəhbərlik edən Şamxal Məmmədov onun bibisi oğludur. Onun sözlərinə görə Şamxal Məmmədov dostları ilə birgə atasının evinə daxil olaraq oradan qızıl-zinət əşyaları və 200 manat pul oğurlayıblar, sonra isə atasını şərləmək üçün evin həyətinə pulemyot patronlarını ataraq qaçıblar. Onun sözlərinə görə, Ş. Məmmədov həmin silah-sursatı əvvəllər oğurlayıb və gizlədib: “Polis əməkdaşları atamı da həbs edib, araşdırma aparılır, məlum olub ki, atamın tapılan silah-sursatla heç bir əlaqəsi yoxdur”.

Şamxal Məmmədovun nənəsi Tənzilə Məmmədova isə Şamxalın əvvəllər öz bibisi Şölənin evindən də oğurluq etdiyini bildirib.

Qeyd edək ki, bir qədər əvvəl Ağsu rayonunun Qaraqaşlı kənd sakinləri Elgün, Mircəfər və Xudaverdi və Şölə adlı şəxslərin mənzilindən naməlum şəxslər tərəfindən qızıl-zinət və məişət əşyaları oğurlanıb. Oğruların tapılması üçün əməliyyat-axtarış tədbirləri davam etdirilir.