SON DƏQİQƏ

Ümummilli lider Heydər Əliyevin anadan olmasının 94-cü ildönümünə həsr olunmuş futbol üzrə “Heydər Əliyev kuboku” uğrunda turnirə yekun vurulub.
Final görüşünün açılış mərasimində çıxış edən Naxçıvan Muxtar Respublikasının gənclər və idman naziri Azad Cabbarov son illər muxtar respublika idmançılarının uğurlu çıxışını yaradılan infra­strukturla əlaqələndirib. Nazir bildirib ki, bu gün Naxçıvanın hər bir bölgəsində idman sahəsində mühüm addımlar atılır. Uşaq və yeniyetmələrin, gənclərin, hətta yaşlı nəslin idmanla məşğul olmaları üçün idman zalları, obyektləri istifadəyə verilib. Həmçinin Naxçıvanda futbolun inkişafı üçün şəhər və rayonlarla yanaşı, kəndlərdə də stadionlar gənclərin ixtiyarına verilib. Azad Cabbarov ulu öndərin xatirəsinə həsr olunmuş turnirdə iştirak edən hər bir komandaya gələcək oyunlarda uğurlar arzulayıb.

Qeyd edək ki, Naxçıvan Muxtar Respublika çempionatında iştirak edən komandaların mübarizə apardığı turnirin final görüşündə “Araz-Naxçıvan” və “DİN-Darıdağ” futbol komandaları üz-üzə gəlib. Naxçıvan Muxtar Respublika Stadionunda keçirilən həlledici matç öz gərginliyi ilə azarkeşlərin alqışına səbəb olub. Görüşdə üstünlük nümayiş etdirən “Araz-Naxçıvan” futbol komandası Tağı Seyidovun iki, Adil Xudaverdiyevin bir qolu sayəsində meydandan 3:1 hesablı qələbə ilə ayrılıb.
Görüşdən sonra hər iki komanda diplom və hədiyyələrlə, qalib olan “Araz-Naxçıvan” komandası kubokla mükafatlandırılıb. Mükafatları Naxçıvan Muxtar Respublikasının gənclər və idman naziri Azad Cabbarov və Futbol Federasiyasının sədri Səbuhi Şahverdiyev təqdim ediblər.

Emtv.az