SON DƏQİQƏ

Hazırda dünyada bir milyarddan çox məktəblinin dörddəbir hissəsi müntəzəm olaraq təqiblərə və digər ələsalma formalarına məruz qalır. Yaşı 11-15 arasında olan hər dörd uşaqdan biri yaşıdları tərəfindən fiziki zorakılığın, yaxud psixoloji amansızlığın obyektinə çevrilir.

Emtv.az BMT Xəbərlər Mərkəzinə istinadla xəbər verir ki, bu məlumatlar məktəblilərin yaşıdları tərəfindən şiddətə məruz qalması və qorxudulması haqqında yeni məruzədə yer alıb. Məruzə Seulda milyonlarla uşaq və gəncə toxunan bu problemə həsr olunmuş beynəlxalq simpoziumda təqdim edilib.

Məruzədə deyilir ki, 11-13 yaşlı məktəblilərin 34 faizi ötən ay məruz qaldıqları təqiblər barədə məlumat veriblər. Uşaqların 8 faizi belə münasibətlə hər gün üzləşir.

UNESCO-nun baş direktoru İrina Bokova deyib: “Məktəbdə zorakılıq və hədə-qorxu təhsil hüququnun kobud şəkildə pozulmasıdır”. O əlavə edib ki, “simpozium və məruzələr UNESCO-nun məktəb və digər təhsil ocaqlarının bütün şagirdləri üçün təhlükəsiz və sakit təhsil mühitinin təmin edilməsi səylərinin bir hissəsidir”.

Məruzədə deyilir ki, məktəblərdə uşaqlar təkcə fiziki və psixoloji həqarətlərə məruzə qalmırlar, həm də seksual zorakılığın qurbanı olurlar. Bütün bunlar tədris prosesini pozur, məktəblilərin psixi və emosional durumuna ziyan vurur.

Ekspertlər müəyyən ediblər ki, homofob təhqirlərin qurbanı olmuş uşaq və yeniyetmələrdə həyəcanlılıq, depressiya halları inkişaf edir, özünəqiymət azalır. Onlar xarici aləmdən təcrid olmağa çalışır, qəsdən özlərinə zərər vurur, tez-tez intihar barədə düşünürlər.

Məktəb mühitində zorakılıq çox vaxt gender stereotipləri ilə də bağlı olur, habelə sosial və etnik rəng daşıyır.

2016-cı ildə 18 ölkədən 100 min gəncin iştirakı ilə aparılan sorğuda rəyi soruşulanların 25 faizi xarici görünüşlərinə, 25 faizi gender mənsubiyyəti və seksual oriyentasiyasına, 25 faizi etnik mənsubiyyətinə görə təhqir olunduqlarını bildiriblər.

Məruzədə yaşıdlarının zorakılıq hərəkətlərinə və hədə-qorxusuna qarşı necə mübarizə aparmaq barədə bir sıra tövsiyələr var. Seul simpoziumuna 70 ölkədən 250-dən çox iştirakçı qatılıb.

Emtv.az