SON DƏQİQƏ

Eldəniz Quliyev: “Proseslər nəticə etibari ilə sosial partlayışa gətirib çıxarda bilər”

Bir neçə gün bundan öncə Biləsuvarda hökumətin işıq pulu siyasətinə etiraz edən vətəndaşlarla polis əməkdaşları arasında qarşıdurma yaranıb. 3 nəfərin həbs edilməsi, 9 polis əməkdaşının yaralanması ilə nticələnən olay bütün ölkədə ciddi müzakirəyə səbəb olub.

Bahalaşma siyasətinin davam etməsi, sosial-iqtisadi durumun ağırlaşması fonunda digər rayonlarda da oxşar etirazların baş verməsi mümkündürmü? Məlum proseslər ümumxalq etirazına çevrilə bilərmi?

Açıqlamasında məsələyə münasibət bildirən Azərbaycan Ziyalılar Birliyinin sədri Eldəniz Quliyev proseslərin yaxşı heç nə vəd etmədiyinə diqqət çəkdi:
“Heç şübhəsiz ki, belə bir ehtimal mövcuddur. Belə bir məsəl var ki, elnən gələn bəla toy-bayramdır. Lakin məsələ bundadır ki, bu bəla elnən gəlməyib. Çünki bunun nə hüquqi, nə də maliyyə əsasları yoxdur. Baxın, bu gün qazın pulu artırılır. Lakin bu gün Azərbaycan hökumətinin imkanı var ki, qazı öz xalqına pulsuz versin. Ancaq təəssüf ki, qazın da, işığın da, suyun da qiymətini qaldırırlar. Qiymətlər ilan kimi insanları çalır. Bu isə nə qədər arzuedilməz olsa da, nəticə etibari ilə sosial patlayışa gətirib çıxarda bilər. Odur ki, yaxın gələcəkdə Biləsuvardakı olayların digər rayonlarda təkrarlanma ehtimalı böyükdür”.

Seymur Əliyev