SON DƏQİQƏ

Bir qrup Ucar sakini Yerli mətbuata müraciət edib

Müraciət müəllifləri - Cəbrayılov Zahid Vaqif oğlu, Əliyev Rasim Sahib oğlu, Səmədov Davud Qadir oğlu, Məmmədov Əli Zəki oğlu, Qasımov Teymur Osman oğlu və digərləri Ucarın təhsil şöbəsi rəhbərliyindən narazıdır.

Onlar rayon Təhsil Şöbəsinin (RTŞ) müdiri Fuad İsrayılovun yarıtmaz fəaliyyətindən, orta məktəblərdə istilik sisteminin olmamasından, şagirdlərin əksəriyyətinin xəstələnib dərsə gedə bilməməsindən şikayətçidir:

“Ucar rayonunun məktəblərində istilik sisteminin işləməməsinə görə məktəbli uşaqlarımıza soyuq siniflərdə dərs keçirilir ki, bu açıq-aşkar işgəncədir.

Nəticədə də uşaqlarımız soyuqdan xəstələnirlər.Ucar şəhər 6 № li orta məktəbdə 29 sinif var və 600 nəfər şagird təhsil alır. Həmin məktəbdə qazın kəsilməsinə görə istilik yoxdur.

Şagirdlər və müəllimlər sinifdə papaqla, şərflə, paltolarla oturub dərs keçirlər. Şagirdlərinin yarsı soyuqdan xəstələnib dərsə getmirlər, bir çox valideyinlər isə soyuq sinifdə dərs keçirilməsinə görə uşaqlarını məktəbdən çıxarıblar.

Ucar şəhəri 1 və 5 nömrəli orta məktəblərində də bu problem var. İsti kabinetindən çölə çıxmayan Ucar RTŞ müdiri Fuad İsrayılov heç bir tədbir görmək istəmir. Çünki bu adamı ancaq öz maddi maraqları düşündürür.

Rayonun bir neçə yerində restoranları, ticarət obyektləri fəaliyyət göstərir, Məlikballı kəndində böyük ferması, bahalı avtomaşınları, rayonda və Bakı şəhərində evləri var”.

Şikayətçilər bildiriblər ki, onun bu vəzifədə qalması Ucar rayon təhsil sistemini tamamilə iflic edib: “Biz mətbuat vasitəsi ilə Prezident İlham Əliyevə və Təhsil Naziri Mikayıl Cabbarova müraciət edib xahiş edirik.

Ucar rayonunda istilik sistemi işləməyən orta məktəblərə nəzarət edilməsinə tapşırıq versinlər və başı kommersiya fəaliyyətinə, pul toplamağa qarışmış Fuad İsrayılovun barəsində ciddi tədbirlər görsünlər”.
Emtv.az