SON DƏQİQƏ

Qubanın ən qədim kəndlərindən biri hesab olunan Qonaqkənd Vəlvələ çayının içində - vadisində yerləşir. Bu səbəbdən yaşayış məntəqəsinin arxasındakı dağlardan axıb gələn sel suları da qəsəbə üçün həmişə təhlükə yaradır. Lakin son günlər bu təhlükə daha da artıb. Vəziyyət o qədər kritikləşib ki, hətta bu yaxınlarda Bakı-Quba-Rusiya yolunun Vəlvələ kəndinin yaxınlığından keçən Vəlvələ çayının üzərindəki Vəlvələ körpüsünün beton dirəklərini belə sel yuyub.
Qonaqkənd sakini Niyatulla Orucovun Emtv.az-a verdiyi məlumata görə son günlər yağan güclü yağışlar və əriyən qarın nəticəsində çayın səviyyəsi xeyli qalxıb evlərin hasarlarına çatıb və hətta həyətyanı sahələrə dolub: “Ən acınacaqlısı isə selin qəsəbədə yaşayan 1500-dən çox insanın təsərrüfatına vurduğu ziyan yox, birbaşa onların həyatına təhlükə yaratmasıdır”.
Niyatulla Orucov bildirib ki, sürüşmə nəticəsində keçmiş Atuş kəndi ərazində Vəlvələ çayının qabağı “boğulub” və çayın məcrası genişlənib, suyun da səviyyəsi qalxıb. Niyatulla Orucov həyəcan təbili çalaraq deyir ki, son zamanlar sakinlərinin çoxu selin qəsəbəni basması təhlükəsindən səksəkə içindədir: “Hər an faciə baş verə bilər, camaat su içində qala bilər. Sentyabr ayının 2-i, 24-ü,17-i, oktyabr ayının isə 13-ü,15-i,17-si çayın səviyyəsi artıq evlərə çatıb”.