SON DƏQİQƏ

Ukraynanın Ali Radası II Dünya Müharibəsi haqqında Ukrayna, Polşa və Litva parlamentlərinin həmrəylik bəyannaməsini qəbul edib.
Emtv.az UNİAN agentliyinə istinadən xəbər verir ki, sənəddə II Dünya Müharibəsinin başlanmasına görə məsuliyyət nasist Almaniyası və Sovet İttifaqının üzərinə qoyulur.
“Biz o fakta diqqəti cəlb edirik ki, iki totalitar rejim arasında 23 avqust 1939-cu ildə bağlanmış Ribbentrop-Molotov paktı II Dünya Müharibəsinə gətirib çıxardı. Müharibəyə sentyabrın 17-də Sovet İttifaqı qoşuldu”, - bəyannamədə vurğulanır.
Həmçinin bildirilir ki, 1945-ci ilində Yaltada qəbul edilən qərarlarla bütün Şərqi və Mərkəzi Avropada yarım əsr davam etmiş əsarətin yeni mərhələsi başlandı.
Qeyd edək ki, 1939-cu ilin yazında Qərb ölkələri ilə faşist bloku dövlətləri arasında ziddiyyətlər yüksək səviyyəyə çatdı. Təminat verilməsinə baxmayaraq, Almaniya 1939-cu ilin martında Çexoslovakiyanı zəbt etdi və parçaladı. "Polşa böhranı" meydana çıxdı.
Belə bir şəraitdə təcavüzkarı cilovlamaq məqsədilə 1939-cu ilin martında SSRİ, Böyük Nritaniya və Fransa arasında danışıqlar başladı. Lakin bu danışıqlar heç bir nəticə vermədi və SSRİ Almaniya ilə danışıqlara getdi.
1939-cu il avqustun 23-də Almaniya ilə SSRİ arasında on il müddətinə bir-birinə hücum etməmək barədə Ribbentrop-Molotov paktı bağlandı. Həmçinin ona əlavə olaraq Avropanı nüfuz dairələrinə bölmək barədə gizli protokol qəbul olundu.
Gizli protokolda Almaniya əvvəllər Çar Rusiyasına daxil olmuş Finlandiya, Latviya, Estoniya və Bessarabiya üzərində SSRİ-nin maraq dairəsini tanıdı. Tərəflər Polşanı bölüşdürmək barədə də razılığa gəldilər.