SON DƏQİQƏ

Cəmiyyətdə mənəvi dəyərlər pulla ölçülməyə başlayıb və ya özü nura möhtac olan şam.

Böyük fateh İsgəndərdən soruşdular: - Valideyinini çox sevirsən yoxsa müəllimini?
Dedi: Müəllimimi. Valideyinim məni fani dünyaya gətirmişdir, müəllimim isə mənə əbədiyyət bəxş etmişdir.

Bəli əgər dünyanı lərzəyə salan fateh İsgəndər müəllimini Valideyinindən uca tuturdusa onda köməksiz gücü yalnız biliyə çatan ( eyni zamanda tərbiyəsiz, vicdansız valideyinlər tərəfindən döyülən və təhqirlərə məruz qalan) müəllimlərimizi bizlər başımızın üzərində gəzdirməliyik. Lakin bunu edirikmi?

- Son çağların olayları, baş verən dəyişiklər müəllimlərə də öz təsirini göstərib. Açığını deyim ki, keçmişdə, imperiya zamanında mövcud olan müəllim nüfuzu indi əriyib-öləziyir, sönməkdə olan şama bənzəyir. O, şam ki, bir vaxtlar ailəmə nur səpdiyi halda indi özü nura möhtacdır.

Bunun isə səbəbləri var.

- Öncə cəmiyyətdə mənəvi tarazlığın pozulmasını göstərmək olar.
Nədir bu pozulma?

- Hamıya gün kimi aydındır ki, vaxtı ilə bilik cəhətdən ən geridə qalanlar, indi öz "şöhrəti" ilə müəllimlərini geridə qoyublar.
Yəni başqa sözlə desək, cəmiyyətdə mənəvi dəyərlər əl çirki saydığımız pulla ölçülməyə başlayıb.

"Elmsiz bu dünyadan baş çıxartmaq olmaz" deyən müəllimi bu gün rişxəndlə süzən gədalar öz pulları ilə cəmiyyətə dərs keçirlər.
Öz ömrünü, gözünün nurunu bu millətə verən müəllim, professor bu gün əl açıb dilənmək həddinə catıbsa (və yaxud da dilənirsə), başqaları isə bunu laqeydcəsinə süzüb-süzüb, arxa çevirib gedirlərsə gələcəyimiz üçün daha qorxulu şərait yaranmırmı?

Burada yadıma görkəmli publisist-şair Famil Mehdinin "Dilən professor, utanma dilən" şeiri düşür.

Axı o professoru belə vəziyyətdə görən hansı uşaq təhsilə, elmə yaxın düşəcək?
Biz gənc nəslə nə ilə izah edək elm adamlarının çağdaş vəziyyətini?
Hansı yalanı sataq bu qəlbi təmiz uşaqlara?
Deyək ki, bizim mühit də elmsizlər pul kisələri ilə hakim kəsilib bu cəmiyyətə?

- Bu aysberqin görünən tərəfidir. Görünməyən tərəflərindən biri isə elm xadimlərinin belə yetişdirən müəllimlərimizin də içərisində bu gün elələri varki, müəllim adını daşımağa layiq deyil. Məktəbə gəlməyi öz təzə paltarları və ziynətini nümayiş etdirmək üçün lazım bilən, anlamın, elmin deyil, bir parça diplomun arxasında gizlənənlərin də günahı var bu işlərdə.

Adi danışıq qabiliyyəti olmayan, məktəbi bazar sayan, elmdən işıq illəri qədər uzaq olan belələri indi yağışdan sonra çoxalan göbələklər kimi artmaqdadır.

Biliyi olub onu işlətməyən-yeri şumlayıb dən səpməyən adama bənzəyir.

Sədi Şirazi gözəl deyib. Oxuduğuna əməl etməyən alim məşəl gəzdirən kora bənzəyir.

Belə-belə işlər.

Əziz dostlarım, əziz müəllimlərim!

Siz Allah məni bağışlayın. Mən sadəcə olaraq öz düşüncələrimi qisməndə olsa Sizlərlə bölüşməyə, paylaşmağa çalışdım...
ARDI VAR