SON DƏQİQƏ

Rusiyanın Azərbaycanlı Gənclər Birliyinin (RAGB) təşəbbüsü ilə keçirilən “Biz Böyük Qələbənin varisləriyik” adlı ümumrusiya aksiyası çərçivəsində Volqoqradda iki dəfə Sovet İttifaqı Qəhrəmanı Həzi Aslanovun xatirəsinə həsr edilmiş tədbir təşkil olunub.

"EMTV.az" xəbər verir ki, tədbir iştirakçıları Həzi Aslanovun barelyefi önünə tər çiçəklər qoyub, 16 nömrəli orta məktəbdə Stalinqrad Üçüncü Qvardiya Mexanikləşdirilmiş Korpusunun Döyüş Şöhrəti Muzeyinə ekskursiya ediblər.

Xatırladaq ki, Heydər Əliyev Fondunun vitse-prezidenti, RAGB-nin sədri Leyla Əliyevanın təşəbbüsü ilə 2013-cü ildə bu muzey tam bərpa edilib, məktəbdə idman kompleksi tikilib.

Sonra təşkil edilmiş “dəyirmi masa”da tarix müəllimi Tatyana Bulatova çıxış edib. RAGB-nin Volqoqrad bölməsinin sədri Dunya Əhədova Böyük Vətən Müharibəsində qazanılmış qələbədə Azərbaycanın rolu, Volqoqrad Tibb Universitetinin Azərbaycanlı Həmyerlilər Birliyinin sədri İsmət İsmayılov Sovet İttifaqı qəhrəmanları barədə söhbət açıb, istefada olan polkovnik-leytenant Gennadi Mxalin öz hərbi xidməti barədə xatirələrini bölüşüb. Məlum olub ki, G.Mxalin müharibədən sonra Bakıda xidmət edib və azərbaycanlı xidmət yoldaşlarını, onların igidliyini və mərdliyini hələ də xatırlayır.