SON DƏQİQƏ

Bolqarıstanın ayrı-seçkiliyə qarşı müdafiə üzrə komissiyası Azərbaycan tərəfi ilə əməkdaşlığa hazırdır.

"EMTV.az" xəbər verir ki, Azərbaycanın Bolqarıstandakı səfiri Nərgiz Qurbanovanın Bolqarıstanın ayrı-seçkiliyə qarşı müdafiə üzrə komissiyasının sədri Ana Cumaliyeva ilə görüşündə bununla bağlı müzakirələr aparılıb. Görüşdə A.Cumaliyeva komissiyanın fəaliyyəti barədə məlumat verərək onun 2005-ci ildə yaradıldığını, üzvlərinin Bolqarıstan Xalq Məclisinin qərarları və Bolqarıstan Prezidentinin sərəncamları əsasında seçildiyini bildirib. Son illər komissiyaya ayrı-seçkilik halları ilə bağlı müraciətlərin sayının artdığını vurğulayan sədr bunu sözügedən quruma inamın artdığı ilə əlaqələndirib. Komissiyanın beynəlxalq əməkdaşlığına toxunan A.Cumaliyeva Avropa İttifaqı ölkələri ilə əlaqələr, Avropa Şurası çərçivəsində fəaliyyətdən bəhs edib. O, Azərbaycanla da əməkdaşlıqda maraqlı olduğunu bildirib, ölkəmizin bu sahədə müvafiq qurumu ilə əlaqələrin qurulmasından, qarşılıqlı təcrübə mübadiləsindən məmnun olacağını söyləyib.

N.Qurbanova belə bir komissiyanın yaradılmasının müsbət addım olduğunu vurğulayıb. O, Azərbaycanda insan hüquqlarının təmin edilməsi sahəsində Ombudsman təsisatının mövcud olduğunu qeyd edib. Səfir, həmçinin Azərbaycanda tolerantlığın yüksək səviyyəsindən danışaraq hazırda ölkəmizdə müxtəlif icmaların nümayəndələrinin sülh şəraitində birgə yaşayışını xüsusilə vurğulayıb. Azərbaycanda multikulturalizmin dövlət siyasəti olduğunu, multikultural ənənələrin təbliğinə geniş yer verildiyini qeyd edən diplomat bu siyasətin nəticəsi olaraq 2016-cı ilin Azərbaycanda “Multikulturalizm ili” elan olunduğunu diqqətə çatdırıb. Bu günlərdə Bakıda keçirilən BMT-nin Sivilizasiyalar Alyansının VII Qlobal Forumundan söz açan səfir Forumun sivilizasiyalararası dialoqun, xalqlar arasında dostluq və əməkdaşlığın möhkəmləndirilməsi baxımından mühüm əhəmiyyət daşıdığını bildirib.