SON DƏQİQƏ

Lənkəran şəhərindəki Heydər Əliyev Mərkəzində “Narkotiklərə “yox” deyək!” mövzusunda maarifləndirici tədbir keçirilib.

"EMTV.az" xəbər verir ki, İcra Hakimiyyəti başçısının birinci müavini İlqar Dadaşov narkotik vasitələrin, psixotrop maddələrin və onların prekurslarının qanunsuz dövriyyəsi, narkomanlığın yayılması ilə mübarizəyə dair dövlət siyasəti və narkomanlığa qarşı mübarizəyə dair 2013-2018-ci illər üçün Dövlət Proqramının icrası istiqamətində görülmüş işlərdən, həyata keçirilən layihələrdən söz açıb.

Maarifləndirici tədbirdə Lənkəran Şəhər Narkoloji Xəstəxanasının baş həkimi Vüqar Əliyev, təhsil şöbəsinin müdiri Şahanə Əhmədova, polis şöbəsi rəisinin müavini Əflatun Məmmədov, Narkomanlığa və Narkotik Vasitələrin Qanunsuz Dövriyyəsinə qarşı Mübarizə üzrə Dövlət Komissiyasının işçi qrupunun nümayəndəsi Vasif Vəliyev, Ailə Qadın və Uşaq Problemləri üzrə Dövlət Komitəsinin nümayəndəsi Səməd Sadıqov, Səhiyyə Nazirliyi Respublika Narkoloji Mərkəzinin həkim narkoloqu Asif Kəngərli çıxış edərək “ağ ölüm” adlanan narkomaniyanın insan cəmiyyətinə gətirdiyi fəlakət, vurduğu iqtisadi-mənəvi sarsıntılar və bu dəhşətli bəlaya qarşı ictimai mübarizənin təşkili barədə danışıblar.

Tədbirdə “Narkomaniya təhlükəli təzahür və insan cəmiyyətinin sağlam inkişafına, mənəvi və əxlaqi dəyərlərinə zərbə” adlı film nümayiş etdirilib.

Sonra şagirdlər, gənclər və mütəxəssislər arasında narkomaniya ilə bağlı debatlar keçirilib.