SON DƏQİQƏ

"KİŞİLƏR" ÖPÜŞÜR ARVADSAYAĞI

(Hər gün dəfələrlə müşahidə etdiyim
“kişi” öpüşlərinin sahiblərinə aiddir)
“Kişilər” dəyişib yoxsa ki, nədir,
“Kişilər” olubdur yaman bayağı.
“Qadınlar soyunur”, namus-ar gedir,
“Kişilər” öpüşür arvadsayağı.

“Kişilər” öpüşür küçədə, tində,
“Kişilər” öpüşür qadın önündə.
Vətənin əzablı ağır günündə,
“Kişilər”öpüşür arvadsayağı.

Tiryək alverçisi olan kişi də,
Sarayçın saçını yolan kişi də,
Pudra-kraskalı harın kişi də,
Elə hey öpüşür arvadsayağı.

Yetmiş yaşında da, qırx yaşında da
Badə məclisində tostlaşanda da,
Gündə əlli kərə rastlaşanda da,
“Kişilər”öpüşür arvadsayağı.

Sanma bu öpüşlər xoş duyğulardır,
Onların çoxunda saxtalıq vardır,
Qaynar dodaqlarda şaxtalıq vardır,
Kişilər öpüşür arvadsayağı.

Əksər öpüşmələr bir mənalıdır,
Nəsə umacaqlı, təmənnalıdır,
Bir qismi sirlidir, müəmmalıdır,
Kişilər öpüşür arvadsayağı.

Babalar boş yerə öpüşməyiblər,
Hər dəfə öpüşlə görüşməyiblər,
Ədəb hədlərindən yan keçməyiblər,
Onlar öpüşüblər kişisayağı.

Bayramda öpüşlə görüşüb onlar,
Novruzdan Novruza öpüşüb onlar,
Küsülü olanlar, kin saxlayanlar
Öpüşüb ürəklə kişisayağı.

Hardansa ağsaqqal qonaq gələndə,
Xəbər yayılardı obaya, kəndə,
Elin hüzurunda, elin önündə,
Babalar öpüşüb kişisayağı.

Vətən dar gündədir, çoxdur qayğımız,
Gəlib çatmalıdır qeyrət vaxtımız,
Bu gün öpüşməyə yoxdur haqqımız,
Vətəni düşünək kişisayağı!
“Kişilərə” baxmayın kişisayağı!