SON DƏQİQƏ

Aprelin 19-da NATO-nun mənzil-qərargahında Azərbaycan Respublikası ilə NATO arasında 2016-cı il “Planlaşdırma və Analiz Prosesi” (PAP) sənədi çərçivəsində tərəfdaşlıq məqsədlərinin müzakirəsi üzrə NATO-nun Şimali Atlantika Şurasının “28+1” formatında görüş keçirilib.

"EMTV.az" xəbər verir ki, Görüşdə Azərbaycan Respublikasının Müdafiə və Xarici İşlər nazirliklərinin, Dövlət Sərhəd Xidmətinin, eləcə də ölkəmizin NATO yanında daimi nümayəndəliyinin təmsilçiləri iştirak ediblər.

Müdafiə Nazirliyinin mətbuat xidmətindən EMTV-yə bildiriblər ki, tədbirdə regiondakı təhlükəsizlik məsələləri, müdafiə sahəsində aparılan islahatlar, PAP üzrə məqsədlərin yerinə yetirilməsi, o cümlədən NATO ilə hərbi uzlaşmanın genişləndirilməsinin perspektivləri üzrə müzakirələr aparılıb.

Müdafiə Nazirliyinin Beynəlxalq Hərbi Əməkdaşlıq İdarəsinin rəisi, general-mayor Hüseyn Mahmudov NATO-ya üzv dövlətlərin nümayəndələrinə aprelin ilk günlərində qoşunların təmas xəttində yerləşən Azərbaycan Respublikasının yaşayış məntəqələrinə və vətəndaşlarına qarşı erməni bölmələrinin təxribatları, onların qarşısının alınması, o cümlədən mülki əhalinin təhlükəsizliyinin təmin olunması məqsədilə Azərbaycan Silahlı Qüvvələri tərəfindən cəbhənin müxtəlif istiqamətlərində keçirilən cavab tədbirləri barədə geniş məlumat verib.