SON DƏQİQƏ

Prezident İlham Əliyevin tapşırıq və tövsiyələrinə müvafiq olaraq mərkəzi icra hakimiyyəti orqanlarının rəhbərləri tərəfindən respublikamızın şəhər və rayonlarında vətəndaşların qəbulu davam edir.
"EMTV.az" xəbər verir ki, növbəti belə qəbul nəqliyyat naziri Ziya Məmmədov tərəfindən yanvarın 22-də Zərdab şəhərindəki Heydər Əliyev Mərkəzində keçirilib. Qəbulda Zərdab, Kürdəmir və Hacıqabul rayonlarından olan vətəndaşların müraciətlərinə baxılıb.

Nazir Ziya Məmmədov əvvəlcə şəhərin mərkəzində ümummilli lider Heydər Əliyevin abidəsi önünə gül dəstələri düzərək, xatirəsini ehtiramla yad edib.

Nazirliyin müvafiq struktur rəhbərlərinin də iştirak etdikləri qəbulda vətəndaşların müraciətləri əsasən Hacıqabul şəhərində müasir tipli avtovağzal binasının tikintisi, Zərdab rayonunun 20-yə yaxın kənd sakinlərinin Bakı şəhərinə daha rahat gediş-gəlişi üçün Ağcabədi-Bakı-Ağcabədi marşrut xəttinin əvvəlki xətt üzrə hərəkətinin bərpası, Zərdab şəhərində mövcud şəhərdaxili sərnişin daşınmasında xidmət səviyyəsinin yüksəldilməsi və qərb bölgəsindən Bakı istiqamətində hərəkət edən avtobusların avtovağzal ərazisinə daxil olması üçün tədbirlərin görülməsi və digər məsələlərlə bağlı olub.

Qəbul zamanı hər bir vətəndaş nazir Ziya Məmmədov tərəfindən diqqətlə dinlənilib. Qaldırılan məsələlərin əksəriyyəti yerindəcə həllini tapıb. Araşdırılması zəruri olan bəzi məsələlər isə nəzarətə götürülərək həlli üçün aidiyyəti şəxslərə konkret tapşırıqlar verilib. Nazirliyin səlahiyyətinə aid olmayan bir sıra şikayət və təklif barədə vətəndaşlara ətraflı izahatlar verilib, eyni zamanda, bu cür müraciətlər müvafiq orqanlara çatdırılmaq üçün qeydiyyata alınıb.

Qəbula gələnlər yaradılan şəraitə, onlara göstərilən diqqətə görə razılıq edərək, bölgələrdə bu cür qəbulların təşkilinin təşəbbüskarı olan Prezident İlham Əliyevə minnətdarlıqlarını bildiriblər.